Shillong, Rymphang 22
Ka Ka Dorbar Shnong Mawbah ha ryngkat Khasi Student Union Mawprem Circle ha ka janmiet ka Sngi Saitjaiñ ka la ïoh kem kumba 50 ngut ki bar Jylla, kiba thmu ban wan buhai shnong bad rieh tngeh hapoh ka shnong Mawbah.
Kine ki bar Jylla ki dei ki Khar Muslim kiba wan kum na Jylla Uttar Pradesh, West Bengal bad Assam kiba pynlong jaka sah ha ka Bilal Masjid kaba don ha Shnong Mawbah bad kiba wan sah khlem ka jingtip jong ka Dorbar Shnong lane na ki bor District Administration.
Na ka liang ka Dorbar Shnong ryngkat ka KSU ka la leit ban rung hapoh jong katei ka Masjid ba la lap ba ki don da ki phew ngut ha katei ka jaka, haba la pynlong ïa ka jingpeit bniah bad bishar ïa ki kot ki sla, la lap ba kine ki briew kim dei satia na kane ka Jylla bad haba pyrshang ban kylli tohkit ïa ka jingthmu ba ki wan hapoh ka shnong, ki la pynpaw ba ki wan ban shim ïa u synniang jong ka jingngeit jong ki.
U Bah Arisstone Thabah Rangbah Shnong Mawbah u la ïathuh ba hadien ba ïoh jingtip ba ki la don ki briew kiba wan ban buhai shnong ha ka jaka mane blei, ka shong ha ryngkat ki samla ki la leit ban khynra ïa katei ka jaka bad lap ba ki don da ki phew ngut ki bar Jylla. “Ka Dorbar shnong ka la dep ban mane ïa katei ka jaka, ba ka jaka mane blei kan dei beit tang ban mane blei, ymlah ban pynlong jaka sah ne thiah ha katei ka jaka.”
U la ong ba ha ki por ba la dep ka don ruh ka jingïakren bad kiba pynïaid ïa katei ka jaka mane blei, ba lada don manp mano kba wan ki dei ban pyntip sha ka Dorbar Shnong, hynrei kane ka jingleh jong kitei ki briew ka dei ba ki la pynkheiñ ïa ki kyndon lane adong jong ka shnong.
U la ïathuh ba ka shnong ka la pyntip sha ki bor pulit ka Jhalupara Out-Post bad haba ki pulit ki la pyndep ïa ki jingdonkam ki la beh noh ïa ki shi syndon na katei ka jaka ba kin leit phai sha ki jaka ba ki wan.
U Bah Arisstone la pynpaw ba ka la dei ka por ban don noh ka aiñ kaba khlaiñ na ka bynta ban tehlakam ïa ka jingwan rung ki briew kiba nabar bad ban pynurlong noh ïa ka mat jingdawa jong ki seng bhlang ban ïoh noh ïa lka Inner Line Permit (ILP) lane ban pyntreikam pura ïa ka Meghalaya Residents Safety & Security Act (MRSSA).
“Ka jingïakren ka dang ïaid, hynrei kine ki briew ki la nang rung bad ka jingrung ki mynder ka la nang jyllei na ka sngi sha ka sngi, ha kaba kane ka la buh jingeh shibun ïa ngi ki nongpynïaid shnong, ngi la ïaleh ha la i bor, hynrei ngi donkam ka jingïatreilang bad ki bor Sorkar,” la ong u Bah Arisstone.
Na ka liang u Samla Boney Thabah Asst. General Secretary ka KSU Mawprem Circle, u la pynrem jur ïa ka Sorkar kaba dang pynsah teng ïa ka jingdawa ïa ka ILP bad maham jur ïa ki briew ki ba wan ban sah hapoh ka shnong khlem ka jingbit jong ka shnong kumjuh ruh ïa ki briew kiba ai jaka rieh ïa ki bar jylla.
“Ngi maham jur bad ngin ym shah da lei-lei ïa ki bar jylla ban wan sah hapoh ka shnong khlem ka jingbit ne ka jingtip jong ka shnong,” la ong u Samla Boney.
