Shillong, Rymphang 22
U Bah Ardent Miller Basawïamoit, President ka Voice of the People Party (VPP) u la pynpaw ba um sngewdei ban ong ban sngewsih halor ka jingkhlad noh jong u Dr. Ricky A.J. Syngkon hynrei u sngewdei ban ong ba u bynnud bad kynjah palat namar ba u Dr. Ricky u la leit sha ka jaka ba kham bha ban kane kaba ngi im mynta.
“Balei ngin ong sngewsih haba u hynmen jong ngi, u khun jong ngi, u pyrsa jong ngi, u nongïalam jong ngi u la leit sha ka jaka kaba kham bha ban ïa kaba ngi im,” la ong u Bah Ardent haba kren ha ka sngi leh burom khatduh ïa ka met ba sah jong u Dr. Ricky ha ka sngi Saitjaiñ jong ka taïew.
U la ïathuh ba ka jingpoi ban ïatreilang bad u Dr. Ricky Syngkon ha kajuh ka party ka dei hadien ba u la rem ïa ka ilekshon ha u snem 2018. “Nga la mut ban iehnoh ïa kane ka kam shakri paidbah lyngba ka saiñ pyrthei hynrei u Dr. Ricky u la wan wad ïa nga ha kaba kum kata ka por, ban ai mynsiem.”
“Ha ka por ba nga la thmu ban iehnoh ïa ka kam shakri paidbah, u Dr. Ricky u la ong, Bah Ardent kam long ïa phi ban iehnoh na kane ka kam,” la ong u Bah Ardent.
Kumta u Bah Ardent u la ai ka burom ïa u Blei ba lyngba ka Voice of the People Party (VPP) la sei ïa une u nongïalam uba khraw, uba la phla ruh ïa ka kyrteng jong u Blei ha ka Ri India baroh kawei.
“U Dr. Ricky u dei u briew uba don ka jingshaniah, uba don ka jingkitkhlieh bad shisha ym don kyntien ban ïakren ïa kaei kaba la jia, hynrei ngi ngeit ba u Blei u don ka jingthmu kaba bha tam na bynta jong ngi kum ka jaitbynriew. Lehse ka long ka jingtynjuh ïa ka jaitbynriew ba ngim dei ban leh sting haba u Blei u sei ïa ki briew ban shakri,” la ong u Bah Ardent.
U la ong ruh “Ngi long kum shi ïing shi sem bad kum ka party haba ngi trei, ngi trei da ka jingsngewthuh, ka nongrim kaba shai bad ngin nym lah ban ïa peiñ lada ka long kumno-kumno ruh khnang ba ngin lah ban wanrah ïa kata ka synshar ka khadar kaba khuid.
