Shillong, Rymphang 22
U MLA ka United Democratic Party (UDP) na West Shillong Constituency u la ong ba u Dr Ricky AJ Syngkon bad ka jingim jong u ka dei ka nuksa ne ka nongmuna ïa ki nongïalam baroh.
U Bah Paul u la pynpaw ba ka jingkhlad noh une u nongïalam ka la long ka jingduhnong kaba khraw, ba kum ka Jylla ka la duhnoh ïa u nongïalam u ba khraw pyrkhat, u ba wat ban shakri, ym ban shah shakri.
U la bynniaw ba ka long shisha ka jingduh kaba khraw ïa ka Jylla khamtam ha ka jaitbynriew kaba don hapdeng ka jingkyrduh ïa ki nongïalam ha kane ka pateng kaba mynta.
U Bah Paul u la ong ba ka jingim jong u Dr. Ricky AJ Syngkon kan pyrsad mynsiem ïa ki nongïalam kiba dang don mynta bad kiba dang pyrshang barabor ïa ka jingbit jingbiang jong u paidbah ba bun balang jong ka Jylla ba kin lah ban ai ïa kaba bhatam khlem da khmih lynti ban ïoh ïa ka nongkylliang.
Haba pyrto ïa ka jingim u Dr Ricky AJ Syngkon, u Bah Paul u la ong ba “U long u briew u ba sani bha, u ba peit bniah haba u leh ia kano kano ka kam.”
Shuh-shuh u la ïathuh ïa ka jingïakynduh jong u, ba u Dr.Ricky AJ Syngkon u long u briew u ba buh ha khmat ïa ka ka bit ka biang jong u paidbah, khlem da buh ha khmat ïa ka jingïapher ha ki seng saiñ pyrthei. “Ha ka jingïakynduh ngi la ïakren bun kiei-kiei bad nga sngew ba ngi long kiba donbok ka jingleit jong u hapoh ïingdorbar parliament, watla ka dei tang ha ka por ba khyndiat ruh, hynrei ba u la ïashimbynta ha ki jingïatai bad ba u la pynpaw sha ka pyrthei ïa ki jingdonkam ha ka jaitbynriew jong ngi” u la ong.
U Bah Paul u la bynrap ba ka jingjylliew jong ka jingim jong u briew la thew na kaba kumno ka ktah ïa kiwei, “Ngi thew ïa ka jingim, ym na ka jingjrong jongka, hynrei na ka jingjylliew jong ka.”
