Shillong, Rymphang 21
U Bah Cliffton AJ Syngkon uba dei u para jong u Dr. Ricky AJ Syngkon, u la pynpaw ba baroh shipara kim ïoh hynmen shuh kum u Dr Ricky Syngkon namar u long u hynmen uba pynkmen shisha ïa ki ha ka por ba ki dang khynnah bad u ri ju sumar bad buh jingdwai ruh ïa ki bad u long u hynmen uba komik bha namar u ju mlien ban pynrkhie ïa ki.
U la pynpaw ruh ba haba u Dr.Ricky u don ha ïing katno ki sngew shngaiñ bad u long ruh u hynmen uba ju sngap bad ai jingmut ïa ki man ka por bad u ju hikai ruh ïa ki ba kin buh jingdwai haba ki mut ban leh ïa kaei kaei.
“U Dr.Ricky um ju mutdur ban rung sha ka kam hima sima hynrei shisien ba u la kut jingmut ban leh ïa kane ka kam u la trei shisha,” u la ong.
Shuh shuh u la ïathuh ba u Dr.Ricky u ju kwah palat ban leh na ka bynta ka Jylla ka long ïa ki kam khappud, ka kam imlang sahlang, ka pule puthi bad ka koit ka khiah bad khamtam ban pynbeit ïa ki kynrum kynram hapoh ka Jylla.
U la ïathuh ruh ba ha man ki exam u Dr.Ricky Syngkon u ju wan beit shakhmat bad ka long ka jingsarong ïa ka ïing ka sem hi baroh kawei. “U ju hikai ïa ngi ban leh rit, trei hok bad ban don ka mynsiem ka jingsngewlem ïa kiba duk ba shitom ki bym lah ban ïeng ban ban kyrshan ïalade bad u ju hikai ruh ïa ngi ban ïarap i wei ïa wei,” la bynrap u Bah Cliffton.
Kumta u Bah Cliffton AJ Syngkon u la kyntu ïa baroh ki paidbah ba kin bud ka nuksa kum u Dr.Ricky ban pynim ïa ka kyrteng jong u, da kaba treishitom, trei hok, im hok, leh rit bad ban don ka jingsngewlem para briew.
