Shillong, Rymphang 22
Ka ‘thei ïalehkai ka Jylla, ka Sanfida Nongrum ka la don hapoh ka thup jong ki 26 ngut ki ‘thei ïalehkai ki ban mihkhmat ïa ka kynhun ïalehkai ka ri India ha ka AFC Women’s Asian Cup 2026 ka ban long ha Australia ha u bnai ban wan.
Ka Sanfida ka la don bynta lang bad ka kynhun jong ka India kaba la leit sha Turkey ha u Kyllalyngkot mynta u snem na ka bynta katto katne tylli ki jingïalehkai paralok pyrshah ïa ki klob jong katei ka ri bad ka don ruh ha ka prokram kilanmet kaba 10 sngi shwa ban leit sha Australia.
Kumba ka long mynta ka Sunfida ka la lah ban thaw ïa ka khana na ka bynta ban long ka kynthei kaba nyngkong eh ka jylla Meghalaya ban don ha ka kynhun ïalehkai (senior) jong ka ri.
Ka jingïoh rung kane ka ‘thei ïalehkai ka la wan hadien ba ka coach ka India ka Amelia Valverde ka la pynbna ha ka sngi Thohdieng. Ka Sanfida, kaba la tip kum ka Polly, ka dei kawei na ki hynriew ngut ki ‘thei ïalehkai ki bym pat ju ïoh ban ïalehkai ha ka kynhun bad ka dei kawei na kiba dangkhynnah hapoh kane ka kynhun bad kiwei pat ar ki ar ngut ki dei kiba dang 20 snem.
Haba pynpaw ha ka rynsan social media, u President ka Meghalaya Football Association u Bah Hamletson Dohling u la ong ba kane ka long ka jingsngew sarong ïa ka Jylla hi baroh kawei bad ka ban pynsah kynmaw ha kane ka jingïaid lynti jong ka. Haba pynpaw shaphang ka Sanfida, u la bynrap da kaba ong, “Ka jingïaid lynti jong phi, ka jingtrei shitom bad ka jingngeit kaba skhem ka la wanrah ïa phi sha kane ka thup. Phi ïoh ban phong ym tang ka jersey jong ka India, hynrei ka jingkyrmen bad ka jingangnud jong kiwei ki ‘thei ïalehkai ka Jylla kan sa urlong nangne shakhmat ba ki lah ban pynurlong. Te kumta nga kitbok kitrwiang ba phi ïoh ka jingkhlaiñ, ka jingshaniah bad ka ban pynkynmaw lyngba kane ka lympung.”
Ha katei ka lympung ka India ka la don ha ka Group-C ha kaba kan sdang ïa ka jingïalehkai ba nyngkong pyrshah ïa ka Vietnam ha ka 4 tarik u Lber ha Perth Rectangular Stadium ha ka por 4:30 janmiet, kumjuh ïa ka Japan ha ka 7 tarik ha kajuh ka por. Ka jingïalehkai ba khatduh jong kane ka Group kan long pyrshah ïa ka China Taipei (Taiwan) ha ka 10 tarik u Lber ha Western Sydney Stadium ha ka por 2:30 janmiet.
