Bhubaneswar, Rymphang:
Ka sorkar Odisha ha ka sngi Palei ka la kyrpad ïa ka sorkar pdeng ba kan shim khia mardor na ka bynta ban pynphai biang ïa ki 6 ngut ki nongtrei na Kendrapara distrik kiba la ïathuh ba ki la shah bat mraw ha u nongpynïaid kam jong ki ha kawei ka karkhana plywood ha Thailand.
U Additional District Magistrate (ADM) u Nabakrishna Jena u la ong ba hadien ba la tip ïa ka jingeh jong kitei ki 6 ngut ki nongbylla, ka bor synshar ka Kendrapara ka la rah ïa katei ka kam sha u Assistant Labour Commissioner ka Bhubaneswar. La ai ïa ki jingtip ba bniah kynthup ïa ki passport jong ki sha ka sorkar ban pynsuk ïa ka jingïarap ba kyrkieh.
Hadien kata, u Principal Resident Commissioner uba sah ha Delhi, u Vishal Gagan, u la thoh da ka shithi sha u Additional Secretary jong ka Ministry of External Affairs ban pyllait im ïa ki nongtrei kiba sahkut, ong u Jena.
Kitei ki nongtrei ki dei kiba la tip kyrteng kum u Prasant Rout na ka shnong Upalei, u Jayant Mallick na Nuagaon, u Yasobant Sahoo na Kujipur, u Himanshu Behera na Katanabania bad u Hemant Behera na Katarabania, baroh ki don ha Kendrapara nalor u Manoranjan Sahoo na Kaudiapala ha ka distrik Bhadrak ba marjan.
Haba batai ïa ka jingeh jong ki ha ka durkhih ba la paw khubor ba la ring ar sngi shwa, ki nongtrei Odia ki la kynnoh ba ki shah set hapoh karkhana ha Chon Buri, Thailand bad shah pynshitom beiñ ha ka liang ka met bad ka jingmut jingpyrkhat jong ki da u nongpynïaid jong ki. La ïathuh ba ki khlem ïoh tulop ha kine ki lai bnai ba la dep. Ki nongbylla ki la kyrpad ïa ka sorkar jylla ban pynsuk ïa ka jingwanphai jong ki sha la ki shnong ki thaw.
Na ka liang u Myntri Rangbah barim ka jylla u Naveen Patnaik u la pynpaw ïa ka jingsngewkhia halor ka jingeh jong ki nongbylla kiba sahkut ha Thailand.
Haba shim ïa ka jingkren jong u ha ka rynsan X, u Naveen u la ong, “Nga sngewkhia jur ban tip ba hynriew ngut ki briew na Odisha ki shah lehbeiñ ha u nongpynïaid jong ki ha Thailand bad ki don ha ka jingeh kaba khraw. Kyntu ïa ka sorkar India, ka Ministry of External Affairs bad ka Chief Minister’s Office ba kin shim ka jingtuklar halor kane ka bynta da kaba pyntreikam kyrkieh ha ryngkat ka jingïatreilang jong ki heh sorkar bad ki heh pulit ka Thailand na ka bynta ban ïoh pyllait noh kham kloi ïa ki.”
