Ka nongbah Shillong ka la sdang ban kup biang ïa ka dur phyrnai haba phai ha ka liang jong ka jinglong ki surok. La ïohi ba kiba bun ki bynta jong ki surok kiba don ha nongbah Shillong ki la ïoh ban kup biang ïa ka rong ïong ne ka jingtap ne siang rong biang. Ka jingïoh jong ki surok ha kylleng ki bynta jong ka nongbah Shillong ban phong ne kup biang da ka rong thymmai, ka la pynkylla dur bad wanrah ïa ka jingitynnad bad khamtam lei ka jingkmen hapdeng ki nongleit nongwan, kiba la lait na ki thliew ki syar hynrei la long kumba ïaid halor ka ‘carpet’ kaba jlih bad jem jai. Ki surok ki la ïong khrik, kaba donkam mynta ka long sa ka jingkhuid pat, kaba kum ki nongshong shnong ngi dei ban shim ïa ka jingkitkhlieh ym ban shaniah ha kiwei hynrei ban peit hi kumno ban ïaleh ban pynneh ïa ka khuid ka suba ym tang ha ki jaka ne phyllaw ïing hynrei ha ki rud surok syngkien ruh kumjuh.
Ka jingsiang rong biang ha kiba bun ki bynta jong ki surok ha nongbah Shillong ka la long ruh ka kam kaba ïaid sted bha bad ba ka jingsiang ruh kumba ka paw ka long rben bad kaba ipaka bha. Hynrei wat hapdeng ka jingkmen ban ïohi ïa ka surok kaba bha bad paka bha ka don ruh ka jingdiaw mynsiem khyndiat ha ki katto katne ki bynta naba ka jingsiang rong kam long pura beit sbak shaduh kyndong ne kynroh hynrei la pyllait khyndiat kaba la rah pat kham hajrong da katto katne inshi.
Ka jingsngewnguh ka leit sha ka tnad PWD ka Sorkar Jylla kaba la shimkhia ïa kane ka bynta bad khamtam ïa u Symbud Myntri Rangbah ka Jylla u Bah Prestone Tynsong bad ruh u Myntri Rangbah Conrad K Sangma. Ym tang kane ka jingsiang rong thymmai ba la wanrah na ka bynta ban pynsuk ïa ka leit ka wan bad ruh ban pynitynnad ïa ki shnong ki thaw hynrei ngi la ïoh ban sakhi ruh ba nalor ki surok rim kiba la don lypa, ka jinglah ban pynmih ïa ki surok thymmai ha kiba bun ki bynta jong ka nongbah Shillong bad ruh sha ki bynta bapher bapher jong ka district bad ka jylla hi baroh kawei, ka la pynsuk shibun ïa ka leit ka wan bad khamtam lei ban pyllait na ka jingsahkut ha ka dheng kali kaba ngi ju mad khamtam ha nongbah Shillong. Ka jingwanrah ïa ki surok thymmai khamtam ka jingpynheh surok ruh ka la long kaba ïaid shaid shaid, la ngi phai sha ki bynta jong ka thaiñ New Shillong, ka thaiñ Upper Shillong ne kiwei kiwei ki thaiñ.
Haba sdang jong ka jingtrei bad haba dang ïaid ka kam ban pynbit pynbiang ïa ki surok, kin don ki ban kynthoh bad kin don ki ban ïaroh. Hynrei kata kampher, ka tnad ba dei khmih bad ka Sorkar ki dei ban ïaid beit shakhmat namar shisien ba la lah ban pyndep tang katta, la suk jai ka mynsiem. Haba biang bad ka suk ka leit ka wan, kiei kiei baroh ki ïaid beit. Ym tang ka jingsuk ha ka mynsiem hynrei ka wanrah ïa ka jingsuk bad jingkmen ha baroh ki liang, namar ngi ju tip ba ka surok ka long kum u budlum jong ka ïoh ka kot bad kam mut eh tang ka jingkiew ka roi ka par ha ki shnong ki thaw hynrei wat ka jingkiew jong ki longïing ha ki liang baroh. Haba bha ki surok, ka leit ka wan ruh ka kloi, ka pang met pang phad ruh ka duna, bad wat ki kali ki motor ruh ki neh slem. Kumta ngi khmih lynti ba ynda la dep pura sa ka surok four-lane ha thaiñ Upper Shillong bad ïoh kloi sa ïa ka surok fly-over ha nongbah Shillong, katno kan pynsuk bad khamtam lei ban lah ban pynduna shisyndon ïa ka jingdheng kali kaba la dei kawei na ki mat kaba la ïakren da baroh.
