Shillong, Rymphang 22
U Myntri ka tnad Public Health Engineering (PHE) Marcuise N Marak dang shen u la pyntip hapoh ka ïingdorbar thawaiñ ba ka Sand Quality Testing ne jingtest ïa u shyiap, u ban pyndonkam haba tei ïa ki Water Project ïa mynta la aiti sha ka NIT, hynrei ka Sorkar ka don ïa ka jingthmu ban buh noh la ka jong ka Lab ha Shillong, Tura bad Jowai.
Kane ka jingai jingpynshai kala mih hadien ba u MLA na ka TMC u Rupa M Marak u la kren halor ka jingtih shyiap na ki wah bad pynpaw ïa ka jingsngewkhia hadien ba kala don ka jingmad kaba sngewsih nalade shimet.
“Nga sheptieng ba ka lah ban long ka bym shngaiñ. Nga la duh ïa i mei jong nga ha u snem 2024 haba ka top um kala khyllem halor jongi,” u la ong bad ka kylli la mynta ka don kano kano ka jingteh lakam da ki kyndon.
U Myntri u la pynthikna ba ïa ka Testing la leh wat na ka bynta ka jingshna ïa ki water-tank project kiba rit.
“Ki kontraktor kiba la ïoh ïa kam ki hap ban phah leh ïa ka Sand Testing sha ka NIT. Kila pynïaid shakhmat ïa ki kam katkum ka kontrak kaba ïaid ryngkat bad ki kyndon jong ka IS,” la ong u Marcuise Marak.
U la pytnhikna ba yn leh da kaba tyngeh lada ki kontraktor ki pynkheiñ ïa ka kontrak. “Khlem pep, lada ngi ïoh pdiang ïa kano kano ka jingujor, ngi ngin leh da kaba tyngeh”.
Katba u MLA ka VPP u Brightstarwell Marbaniang u la wanrah ïa kawei pat ka mat, halor ka jinglait um na ka dam ha Lum Shyllong-Shiliang-Um kaba la tei dang ha u snem ba la dep.
Haba jubab halor kane, u Myntri u la ong, ba ka long kaba kongsan ban ïoh ïa ka Third-Party Certification hashwa ban pyllait ïa kano kano ka jingsiew hapoh jong ka JJM.
“Nga kwah ban kyntu ïa ki dkhot ba lada phi lap ïa kino kino ki jingdkoh, long kiba ïai mlien ban pyntip, khnang ban ïoh ban pynlong ïa ka jingtohkit bad ban lah ban leh da kaba tyngeh,” la ong u Marcuise.
