Shillong, Rymphang 22
Ka Sorkar Jylla ka la shim ïa ki sienjam ban pynbha ïa ki Primary Health Centre bad ki Sub-Centre ha ki jaka nongkyndong, da kaba pynleit jingmut ha ka jingshakri ïa ka koit ka khiah lyngba ki lad ‘digital’ bad ka jingpyntreikam hok ïa ka jingpynpoi ïa ki dawai-dashin.
Ka Meghalayan Medical Drugs and Services Limited (MMDSL) ka pynïaid ïa ka ‘Digital Portal’ na ka bynta ki jaka ai jingsumar ban thied ïa ki dawai ba donkam kumjuh ban buddien ïa ki ‘Stock’ ha ka por ba shisha, da kaba pynpoi lyngba ki 20 tylli ki ‘Warehouse’ jong ka Jylla.
“Kane ka ‘Portal’ ka pynbiang ïa ka jingbuddien ha ka por ba shisha ïa ki ‘Stock’ dawai kiba don ha baroh ki jaka sumar. Kane ka dei ka rynsan paidbah bad lah ban ïoh da baroh,” ong u Myntri ka Koit ka Khiah, Bah Wailadmiki Shylla ha ka jubab ba la wanrah hapoh Ïingdorbar.
Ka jingpynurlong ba pura jong baroh ki dawai ba la buh thup ha ka Corporation Application sha ki jaka sumar ba kham hapoh (CHC/PHC bad kiwei-kiwei) ka long 86.19%.
Ha kine ki 12 bnai ba la dep, u Bah Shylla u la ong ba ka MMDSL ka la shimkhia kumba 12,538 tylli ki jingpynpoi dawai ha kylleng ki jaka sumar haduh ka kyrdan PHC, da kaba pynpoi palat 20,000 synduk ha ka shibnai ha kylleng ka Jylla baroh, ban pyntikna ïa ka jingïoh ïa ki dawai ba donkam bad ki tiar sumar ha ka por kaba biang.
Ïa ka jingpynpoi dawai ba man ka por la leh arsien shibnai sha ki jaka sumar ba kloi eh, ha ryngkat ki jingpynpoi (shuh) ba kyrkieh ba la pynbiang katkum ka jingdonkam, u la bynrap.
