Shillong, Rymphang 22
Ka India ka la mad ïa ka jingshah rem ha ka South Africa da 76 run ha ka jingïakhun kaba nyngkong jong ka Super 8 ha ka T20 World Cup ha ka sngi U Blei.
Ha kane ka jingïakhun kaba la long ha Narendra Modi Stadium kaba ha Ahmedabad, ka South Africa kaba la kam trai ban tied nyngkong ka la lah ban kamai 187 run bad shah pynhap 7 wiket. U David Miller u la long u nongtied uba kynsai ha kaba u la kamai 63 run na ki 35 bol (7x4s & 3x6s) lem bad u Dewald Brevis u la ïoh 45 run na ki 29 bol (3x4s & 3x6s).
Haba wan beh ïa ka thong ki nongtied ka India ki la shem jingeh ha kaba sdang ha kaba ki la shah pynhap 3 wiket kynthuh ïa u Ishan Kishan, Abhishak Sharma bad u Tilak Varma. Ka jinglah ban ïalehkai bha ki nongkawang bol ka South Africa ka la pynlong ïa ka India kan ym lah ban kynjoh sha ka thong bad ka la kamai tang 111 run ha ki 18.5 over.
Ka India kan pynkhreh ïa ka jingïakhun kaba ar pyrshah ïa ka Zimbabwe ha ka sngi Palei.
Haba phai sha kawei pat ka jingïakhun kaba kham hashwa, ka England ka la pynliem noh ïa ka Sri Lanka da 51 run.
Ha kane ka jingïakhun ka la lah ban ïalehkai bha naduh kaba sdang ha kaba ka la kamai 146 run bad shah pynhap 9 wiket ha ki 20 over. U Phil Salt u la shim ïa ka pali tied naduh kaba sdang, u la lah ban pynpaw ïa ka jingtbit bad u la lah ban tied haduh 62 run na ki 40 bol kiba kynthup ïa 6 tylli ki ‘four’ lem bad u 2 tylli ki ‘six’.
Hynrei ki nongtied ka Sri Lanka ki la shem jingeh na ka daw ka jingtbit ki nongkawang bol ka England ha kaba u Will Jacks u la khur haduh 3 wiket, katba ïa ki 2 wiket la ïoh da u Jofra Archer, Liam Dawson bad u Adil Rashid.
Te kumta ka Sri Lanka ka la shah pynkhyllem baroh ki nongtied ha ki 16.4 over bad ban kamai tang 95 run. U kapten kane ka kynhun u Dasun Shanaka u la long u nongtied uba la ïoh bun da kaba u la tied 30 run na ki 24 bol.
