Washington, Rymphang:
U heh jong ka tnat shipai ka US, ha ka Sngi Balang u la iathuh ba katto- katne ki shipai jong ka US, ki mih noh na Syria, kum shi bynta jong ka “jingkylla kaba thmu bad kaba pynshong nongrim ha ki jinglong jingman”.
Ka kot khubor jong ka Wall Street Journal ka la iathuh ba ka US ka la weng noh ia baroh ki shipai jong ka kiba don kumba 1,000 ngut na Syria.
“Ki shipai jong ka US ki dang pynkhreh ban jubab ïa kino kino ki jingma jong ka ISIS kiba mih ha katei ka thaiñ namar ngi kyrshan ïa ki jingpyrshang ba la ïalam da ki paralok ban khanglad ïa ka jingmih biang jong ka kynhun lehnoh”, la ong u heh sorkar, uba la kren khlem da kwah ban pynpaw kyrteng.
“Hynrei ka jingdon jong ka US ha ka jingheh kam donkam shuh ha Syria haba kheiñ ïa ka jingkwah jong ka sorkar Syria ban shim ïa ka jingkitkhlieh ba kongsan ban ïakhun pyrshah ïa ka jingma jong ki lehnoh hapoh ki pud jong ka,” la bynrap biang une u heh sorkar.
Ha ka taiew ba ladep, ki shipai jong ka US, ki la ong ba ki la pyndep ïa ka jingweng noh na ka jaka ba kongsan ha Syria, da kaba aiti ïa ka sha ki shipai Syria, kum ka dak ba khatduh jong ka jingpynkhlain ïa ka jingïadei jong ka US bad ka Syria kaba lah ban pynlah ïa ka jingweng noh kaba kham heh shuh shuh jong ka America.
