Hyderabad, Rymphang:
Ka president jong ka Telangana Jagruthi bad ka MLC barim ka Kalvakuntla Kavitha ha ka sngi Palei ka la pynpaw ïa ka jingthmu jong ka ban seng ïa ka seng saiñ pyrthei kaba thymmai ha kane ka jylla. Haba pynpaw ba ka jingpynlait paidbah kan long ha u Jymmang, ka Kavitha ka la ong ba ka kyrteng jong ka seng kan kynthup ïa ka ‘Telangana’.
“Ka Telangana ka dei ka ‘mother board’ jong ngi. Ka Samajika Telangana (Telangana bad ka social justice) ka dei ka thong jong ngi. Ngin pynïaid ïa ka seng katkum ka jingangnud jong ki briew”, la ong ka Kavitha haba pynpaw ïa ka jingsngewskhem ba ka seng jong ka kan ïoh bat ïa ka bor synshar ha ka Jylla.
Ha ka jingïakren kaba khlem pud bad ki nongthoh khubor, ka MP barim ka Nizamabad ka la ong ba ha ka ilekshon sha ka ïingdorbar thawaiñ ban wan, ka jingkwah nyngkong jong ka ka long ban ïakhun na ka bynta jong ka Siddipet bad ka jingjied kaba ar jong ka Bodhan.
Da kaba kynnoh ba ka seng jong ka kan mih kum ka liang pyrshah ba kongsan ha ka jylla, tang hadien ba la seng ïa ka, ka la ong: “Hadien ba ngi la seng ïa ka seng, ka BJP kan ym don shuh ha ka jylla.
Ka Kavitha ka la pynpaw ruh ba ka seng jong ka kan ïakhun ruh ha ka ilekshon MPTC, ZPTC bad GHMC ban wan. “Ha ka ilekshon ZPTC bad MPTC ngin don ka jingïateh ilekshon bad kawei pat ka seng, lada ai ïa ngi ïa ka shap ilekshon ngin ïakhun ïa ka ilekshon GHMC da la ka jong ka shap”, ka la ong.
