Imphal, Rymphang:
U Myntri Rangbah jong ka jylla Arunachal Pradesh u Pema Khandu, u la pynbna ïa ka bor ding um kum ka nongrim jong ka lawei ka ïoh ka kot jong ka jylla, da kaba pynpaw ïa ki projek kiba shongdor T.2 lak klur kiba la pynkhreh ban sdang noh shen.
Haba kren ha ki jingïalang jong ka sngi pynlong jylla ha IG Park, u Khandu u la plie paidbah ïa u snem 2025-2035 kum ka ‘Shisnem jong ka bor ding um’.
U la ban jur ïa ka bynta ba kongsan jong ka, da kaba kdew, “Mynta, 1.2 GW ki projek ki dang treikam, bad 4.8 GW ki dang shna.
Ka Subansiri Lower Project kaba 2,000 MW la buh ban pyndep mynta u snem, katba ka Projek Dibang kaba 2,880 MW la buh thong ban pyndep haduh 2023.”
Kine ki jingthmu ki kular ban kamai T.4,000 klur ha ka shisnem bad palat 30,000 tylli ki kam ba beit ryngkat bad 16,000 tylli ki kam ba khlem beit, u la bynrap.
U Khandu u la pynpaw ïa ka spah marpoh khyndew jong ka jylla ha u ïong bad u Graphite, ha kaba la dep ban lilam ïa ki mawshun bad kiwei pat ki jingjurip ki dang ïaid shakhmat.
Ka Arunachal ka la kylla na ka jaka ba don ha khappud sha ka jaka ba kiew stet, u la ong. “Naduh u snem 2015, ka Gross State Domestic Product ka la kiew da 166 percent… bad ka jingïoh jong uwei pa uwei u briew ka la kiew da palat 105 percent.
Ka mang tyngka jong ka jylla ka la kiew da 218 percent hapoh katei ka por.”
Ka jingpynïasoh ka long ka nongrim jong ka roi ka par, ha kaba ki surok ki la kiew da 251 percent, la shna 4,060 km ïa ki surok bah jong ka ri, bad T.55,000 klur la kular na ka bynta ki surok bah ha khappud.
Ka koit ka khiah ka ïoh ka jingkyntiew kaba T.3,666 klur, katba ki jingpynkylla ha ka pule puthi lyngba ka ‘Mission Shikshit Arunachal 2029’ ki theh T.750 klur na ka bynta ban pynbha ïoh a ki skul, ki hostel, ka jingpeit bniah ïoh a ka AI, bad ki kamra klas ba nyngkong eh jong ka India ba la shna da ka 3D.
