Tehran, Rymphang:
Ki samla pule jong ka Iran ki la ïalum lang na ka bynta ki jingïalang ba thymmai kiba kyrshan bad pyrshah ïa ka sorkar ha ka Sngi U Blei ban kynmaw burom ïa kito kiba la ïap ha ki jingïakhih ba dang shen, namar ka jingtieng ka la nang mih na ka jingïakynad kaba thymmai bad ka America halor ka prokram nuclear jong ka ri. Ki jingïakhih ba nyngkong eh ki la mih ha u bnai December namar ka jingeh ha ka liang ka ioh ka kot ha katei ka ri kaba la shah pynngat ha ki jingpynjari kyndon, hynrei ki la nang kiew stet sha ki jingïakhih pyrshah sorkar kiba la long kawei na ki jingeh kaba khraw tam ïa ka jinglong nongïalam jong ki lyngdoh niam jong ka ri Islamic ha ki snem kiba la leit noh. U president jong ka US, U Donald Trump, ha kaba sdang, u la pynkmen ïa ki nongïakhih, da kaba byrngem ban tuklar na ka bynta jong ki, katba ki bor synshar, ki dang pynlong ïa ka jingpynshitom beiñ, hynrei shen, ki jingbyrngem jong u, ki la kylla noh sha ka prokram nuclear jong ka Iran, kaba ki ri Sepngi, ki ngeit, ba ka dei kaba thmu ban shna ïa ki tiar ïaleh atom.
Naduh katei ka por ka US bad ka Iran ki la wan phai biang sha ka miej ïakren, hynrei ha kajuh ka por u Trump u la bud ïa ka jingtei shipai kaba heh ha ka thaiñ Middle East kaba thmu ban pynbor ïa ka Iran ban weng noh ïa ka jingïateh kular.
La iathuh ba ka la don ka “jingiakynad” ha ym duna ia ka lai tylli ki skulbah ha ka nongbah Tehran ha kaba ki don ki samla pule kiba la pyrta ia ki jingpyrta “pyrshah ia ka jingsynshar”.
Ka Iran International, ka lad pathai khubor kaba don shabar jong ka ri bad kaba la ai kyrteng kum ka seng lehnoh da ka Tehran, ka la sam ïa ka video ha ki social media jong ki samla pule kiba rah ïa ka lama shwa ka revolution ha Sharif University, kumjuh ruh ïa ki video jong ki jingïalang ha kiwei pat ki jaka pule ba kham heh.
Ki bor synshar ki kam ba palat 3,000 ngut ki la iap ha katei ka jingkulmar, kynthup ia ki dkhot jong ki bor pahara bad ki nongpeitkai, hynrei ki ong ba katei ka jingkulmar, ka dei namar ki “kam lehnoh” kiba la pynmih da ki nongshun jong ka Iran.
Hynrei ka tnat Human Rights Activists News Agency (HRANA) jong ka US, ka la ïoh jingtip ba palat 7,000 ngut ki briew ki la shah pynïap ha katei ka jingpynshitom beiñ, kiba bun ki dei ki nongïakhih, watla ka jingïap ka lah ban nang kiew shuh-shuh.
