Guwahati, Rymphang:
Ki la don haduh 2,000 ngut ki nongshong shnong jong ka shnong Sharifnagar Fakirtilla ha Sribhumi distrik jong ka Assam, kiba la byrngem ban ym leit thep vote, da kaba pynshisha ba ki la shah iehnoh beiñ da ki snem watla ki la kyrshan bunsien ïa u MLA barim jong ki da ka jingkyrshan kaba jur bha.
Ki nongshong shnong ki ong ba katba u Kamalakhya Dey Purkayastha uba la long MLA la lai sien jong ka seng Congress u la ïoh ïa ka jingsynshar kaba khlaiñ na ka thaiñ barim jong ka North Karimganj, hynrei katei ka thaiñ haduh mynta ka ïeng kum ka dak jong ka jingsahkut ka roi ka par bad ka jingbym shimkhia ha ka liang ka synshar khadar.
Ka Sharifnagar Fakirtilla kaba mynshwa ka hap hapoh ka North Karimganj konstitwensi bad mynta ka la hap hapoh ka South Karimganj hadien ba la pynbeit pud, ka duna bha ki jingdonkam ba kongsan. Ym don ki surok kiba biang. Ka jingïoh ïa ka um dih kaba khuid ka dang long ka jingphohsniew kaba jngai. Ha ka por Lyiur, ki um kiba tuid jong ka wah Longai ki ju tap ïa ki surok rit, kaba pynduh jaka ïaid ïa ka shnong sha ki jaka ba marjan bad kaba khanglad ïa ki jingleh jingkam kiba man ka sngi.
Da kaba sngew ba la iehnoh beiñ ïa ki, ki nongshong shnong ki ong ba ki la shah pynbor ban lum jingïarap hapdeng jong ki ban shna ïa ki surok shnong ba kongsan, ka kam kaba ki ngeit ba ka sorkar ka la dei ban shim naduh mynshuwa.
