Shillong, Rymphang 23
Ka Young Guns CC ka la khur ïa ka jingjop kaba nyngkong eh ha ka Super Division Cricket League 2026 ba la pynïaid da ka Shillong Cricket Association (SCA), hadien ba ka la pynliem noh ïa ka Lok Bhawan CC da 4 wiket ha ka lah sngi U Blei.
Ha kane ka jingïakhun kaba la long ha madan ïalehkai kriket jong ka MCA ha Polo, ka Young Guns kaba la jop ïa ka kynting pisa, ka la ailad ïa ka Lok Bhawan ba kan tied nyngkong ha kaba ka la kamai 169 run bad shah pynkhyllem baroh ki nongtied ha ki 32.3 over. U Asif Khan u la khyrwit ïa ka shiteng spah kaba 54 run na ki 62 bol bad u Aditya Shah u la ïoh 36 run na ki 40 bol. Katba u Grish Raj Ray bad u Angkit Tamang ki la khur mar 3 wiket na ka bynta ka Young Guns.
Haba wan shimti ïa ka pali kaba ar ka Young Guns ka la lah ban kynjoh sha ka thong da kaba ka la kamai 170 run bad shah pynhap 6 wiket ha ki 32.5 over. Kane ka la wan lyngba ka jingïalehkai bha u Angkit Tamang uba la ïoh ban khyrwit ïa ka shiteng spah kaba 84 run na ki 95 bol bad u Aditya Singh u la ïoh 22 run na ki 41 bol. Katba u Pankaj Mandal bad u Bikash Singha ki la khur mar 2 wiket na ka bynta ka Lok Bhawan. Ïa ka nam Player of the Match la khur da u Ankit Tamang.
Na ki saw sien ïakhun kiba la lah, ka Young Guns ka la mad ïa ka jingshah rem haduh lai sien bad mynta ka la don ha ka kyrdan ba-ar na shatrai ha ka Group-B. Kumba ka paw ka Rangkynsai (8 poiñ) ka la bat ïa ka kyrdan ba hakhlieh na kane ka group bad ka Sporting CC (6 poiñ) ka la don ha ka kyrdan ba-ar. Te kumta kine ki kynhun ki la rung sha ka semi final na kane ka group.
Ha ka jingïalehkai na ka Group-A ka ban long ha ka sngi Ba-ar kan long hapdeng ka Langsning pyrshah ïa ka Nongmynsong naduh ka por 8:30 mynstep.
