Shillong, Rymphang 23
Ha kine ki sngi kiba mynta ka jingbym ïoh ïa ka umbam umdih kaba khuid ha ki longïing longsem ka la ju ïai jia man ka por bad ki la hap ban shu thied tang ban ïoh pyndonkam ha ïing namar ka jingjngut ka um bad sma.
Kane ka jingjngut ka um ban poi ha ki thliew ïing lehse ka long kaei-kaei kaba sngewsih ha baroh.
Ïa kane ngi lah ban sakhi lyngba kawei ka longïing kaba don ha Dymmiew, Shillong kaba hap hapoh ka Shillong Municipal Board, ha kaba ka la ïoh ïa ka umdih kaba jngut bad ba sma nala.
Katei ka longïing ka la pyntip ïa kane sha ki bor jong ka Municipal bad ki la wan ban peit bniah ha kaba ki lap ba ka um kaba mih na ka kor sorkari ka long kaba khuid, kaba dei na kajuh ka top bad ka um kaba wan sha ïing jong ki. Kumta na ka liang ka Board ka la bthah ïa ki ban phah peitbniah ïa u line jong ki.
La ïathuh ba u nongshna pipe um uba ki la phah peitbniah u la ïathuh ba ym don jinglait ha u pipe jong ki.
Kumta katei ka longïing ka la pynpaw ïa ka jingsngew lyngngoh ba ka um kaba mih ha ïing jong ki, ka long kaba jngut bad ba sma nala.
La ïohi ruh ba ka um kaba ki la pdiang hapoh u bitor ka la long shisha kaba la jngut haduh katta-katta bad tang ban dih ruh kam long namar ka la jakhlia palat.
Na ka liang katei ka ïing ka la kyrpad ïa ki bor ba dei khmih ba kin sngewbha ban ïarap lem ïa ki, ba kin ïoh noh da ka um kaba khuid bad bym don jingsma.
