Shillong, Rymphang 23
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba ka Sorkar jong u ka dang ïaleh katba lah ban pynjynsur ïa ka jingdonkam jaka kaba 100 hektar na ka bynta ka jingtih dewïong katkum ka juk stad saian, ha kaba ki jingïakren ki dang ïaid ban pynhiar ïa kane sha ka 10 hektar.
“Mynta, ngi la sdang ban ïakren bad ki, da kaba ong, ’20 ngut, hynrei, kiba bun na ki nongtih par jong ngi ki dei ki nongtih par kiba rit; hato mynta ngi lah ban pynjynsur noh ïa kane ka kyndon baroh kawei bad ban pynhiar sha ka 10 hektar?’ Kumta, kata ka jingïakren ka dang ïaid mynta, ngin dang ïai bteng ban ïakhun, ngi dang ïai bteng ban trei,” ong u Conrad ha ki nongthoh khubor.
U la batai ruh ïa ka jingsdang jong ka rukom ai laisen bad ka rukom tih par katkum ka juk stad saian kum ka “sienjam kaba khraw”, da kaba bynrap, “Mynta, ngin dang ïai bteng ban trei ban peit kumno ngi lah ban pynbha shuh-shuh da kaba pynduna ïa ka jingdon jong ki hektar na ka 100, lehse 50 ne lehse 40, lada lah, sha ka 5 ne 10 ruh.”
Haba kylli, u Myntri Rangbah u la ïada ïa ka rai jong ka Sorkar ban mynjur ïa ka jingdonkam kaba 100 hektar na ka bynta ka jingtih dewïong katkum ka juk stad saian, da kaba ong ba ka dei ka “rai kaba eh bha” kaba la shim ban ïoh sdang ïa ka jingtreikam.
“Ha Meghalaya, ka rukom bat khyndew ka long kaba kham pher, la hap ban thaw ïa ki aiñ bad ki kyndon kiba pher…ngi la ïaid ha ka lynti ka bym pat tip bad ngim tip kaei ka jingmih nangta,” la batai u Conrad.
U la ong ba ka Sorkar Pdeng ka la kren shai ba ka 100 hektar ka long ka “bym lah shuh ban ïakren” lada ka Meghalaya ka kwah ïa ki “nongshim bynta kiba shimkhia shisha ïa ka kam.”
“Kumta, nga la hap ban shim ïa ka rai…nga la rai, ai ba kan sdang noh. Nga lah ban ym ïoh ïa ki 20 poiñ kiba nga pan…ngin sa wan biang pat sha kane hadien-habud,” u la ong da kaba bynrap ba mynta la bthah ïa ki nongtih par ban ïawan lang ban pynbiang ïa kata ka jingdonkam kaba 100 hektar.
