Shillong, Rymphang 23
U Myntri Rangbah ka Jylla, u Conrad K. Sangma ha ka Lah Sngi U Blei u la pyntikna ba ka jingtohkit ka dang ïaid halor ka jingbym don doktor ha Mawïong Community Health Centre (CHC) ha ka por ba wan pynkit ïa u MP ka Shillong, u Dr. Ricky A.J. Syngkon sha katei ka jaka ha ka 19 tarik u Rymphang.
“Ka jingtohkit ka dang ïaid bad katkum kata ka jingtohkit, ka tnad ka koit ka khiah kan sa shim ïa ki sienjam kiba donkam,” la ong u Conrad da kaba bynrap ba u Myntri ka koit ka khiah u don ha ka kyrdan kaba kham biang ban kren halor kane ka bynta.
U Dr. Syngkon uba dei u nongïalam ka Voice of the People Party (VPP) u la kyllon katba u dang ïalehkai ‘Futsal’ bad la pynkit ïa u sha katei ka CHC, ha kaba la ïathuh ba ym shym la don doktor ha katei ka por. Hadien kane, la pynkynriah noh ïa u sha Dr. H. Gordon Roberts Hospital, ha kaba la pynbna ba u la khlad noh.
