Shillong, Rymphang 23
U Myntri ba khmih ïa ka tnad Bording (Power) Bah Metbah Lyngdoh ha ka sngi Nyngkong u la pyntip hapoh ka ïingdorbar ba haduh 1,22,593 tylli ki smart meter la dep ban pyndait ha Meghalaya haduh ka 8 tarik Rymphang, 2026, bad ha kaba 109 tylli ki jingujor la ïoh pdiang haduh mynta.
Na ka bynta ban ïaleh ban weng ïa ki jingeh, la dep ban buh ïa ka Centralized Customer Care Centre da kaba buh ruh ïa u number ba khlem jingsiew u 1912. Nalor kata, ka CM Connect helpline (1971) ka dang treikam na ka bynta ki jingeh jong ki nongshong shnong, la ong u Bah Metbah ha ka jubab ba la wanrah ha ka ïingdorbar.
