Kathmandu, Rymphang:
Katkum ki khubor, la ïathuh ba 18 ngut ki nongleit jingleit, ki la duh ei noh ïa ka jingim, ha ka jingleit hap bakla kawei ka bos ha ka wah Trishuli hajan ka nongbah Gajuri jong ka distrik Dhading hapoh Nepal. Kane ka la jia ha ka step Sngi Nyngkong.
La ï ba 26 ngut kiwei pat ki nongshong ha katei ka bos, ki la mynsaw ha katei ka jingjia katba katei ka bos kaba mih na Pokhara, ka dang thmu ban leit sha Kathmandu bad kaba la leit hap noh pat ha katei ka wah Trishuli katba ka dang pynher stet na ka surok bah Prithvi, kumba 90 KM na ka phang West jong ka nongbah Kathmandu ha ka por kumba 1:30 jong ka step Sngi Nyngkong.
Ia kitei ki 17 tylli ki metiap, la ioh sei na katei hi ka jaka bad ïa kitei ki 28 ngut ruh la ioh sei na katei ka bos kaba la ngam ha katei ka wah. Ia kitei kiba mynsaw baroh la pynkit sha ki jakasumar bapher, kiba don ha katei hi ka nongbah.
Napdeng kitei kiba khlad, uwei dei u nong New Zealand, uwei pat u nong Japan bad uwei pat u nong Netherlands. Watla ia ka daw jong katei ka jingjia ym pat shym la lah ban tip satia, hynrei ki pulit ki suba ba katei ka bos ka la pynher stet bha bad dei kane ka daw, kaba la pynlong ïa ka, ban ym lah shuh ban tehlakam bad ban poi leit ïaid sharud jong ka surok haduh ba kan da hap shapoh katei ka wah katba ka dang ïaid lyngba nangtei.
