Shillong, Rymphang 23
Ka Federation of Khasi Jaiñtia & Garo People (FKJGP) Upper Shillong Circle ka pynpaw ïa ka jingsarong kaba khraw hadien ba kawei ka nongthoh khubor ka Jylla ka la ïoh pdiang ïa ka khusnam “Best Journalist of Meghalaya.”
“Ka Kong Aihun K Lyngdoh Tron ka dei kaba shong ba sah ha Umlyngka, Upper Shillong kaba trei ha ka kam thoh khubor ha u Mawphor bad Highland Post kum ka Senior Correspondent na Jaiñtia Hills” ong ka kyrwoh khubor u Bah Kitboklang Nongphlang, President FKJGP Upper Shillong Circle.
U Bah Kitboklang u la ong ba ka Kong Aihun ka ïoh ïa ka khusnam “Best Journalist of Meghalaya” ha ka 20th Media Excellence Award 2026 ba la pynlong da ka Media Federation of India ha PLB Auditorium, ITO, ha New Delhi.
Ka Kong Aihun lem kiwei pat ki nongthoh bad nongpathai khubor ba na kylleng jong ka ri India ki la ïohpdiang ïa katei ka khusnam ba la sam da u Director General barim jong ka Indian Institute of Mass Communication (IIMC) u Prof. Sanjay Dwivedi, ha ryngkat ka jingdonlang u Senior Journalist u Prateek Trivedi, u Deputy Director General jong ka National Informatics Centre (NIC) u Dr. LP Sharma bad kiwei-kiwei.
Ka FKJGP Upper Shillong Circle ka la ai jingïaroh ïa ka Kong Aihun ïa u synñiang jong ka ha ka kam thoh khubor bad ban pynsaphriang ïa ki jingtip ïa ki khubor bapher-bapher sha ki paidbah jong ka Jylla Meghalaya mynta la 11 tylli ki snem.
