Kolkata, Rymphang:
U riewsaiñ pyrthei uba la ïaw ka karta bad u Myntri barim ka sorkar pdeng jong ka tnat Railway u Mukul Roy, ïa uba la shah ñiew kum uwei na ki nongïarap ba ïajan bad ka Myntri Rangbah ka jylla West Bengal ka Mamata Banerjee bad u nongprat lynti jong ka All India Trinamool Congress (TMC), u la khlad noh ha ka step jong ka lah sngi U Blei hadien ba u la kem pang kynsan na ka jingthut treikam u klongsnam. Une u la don ha ka rta kaba 71 snem.
U Roy u la khlad noh ha ka por 1.30 mynstep ha kawei ka hospital shimet ha Salt Lake, la pynthikna u khun jong u u Subhranshu Roy.
Ki bahaïing hasem ki la ïathuh ba u Roy u la ïakhun pyrshah ïa ki jingeh kiba bun jait ha ka koit ka khiah ha kine ki ar snem ba la dep. La lap ruh ba u don ïa ka jingpang kaba ktah ïa ka bor kynmaw bad dang shen u la don ruh ha ka Coma.
Ka kam shakri ha ka saiñ hima sima jong u Roy ka la neh palat sawphew snem bad ka kynthup ruh ïa ki por hapoh ka seng Congress, ka TMC bad ka Bharatiya Janata Party (BJP).
U la sdang ïa ka jingïaid lynti jong u ha ka saiñ hima sima bad ka Youth Congress shuwa ba un ïasoh bad ka Banerjee ha ka por ba ka la phet noh na ka Congress ban thaw ïa ka TMC ha u snem 1998.
Kum u dkhot nongseng ïa ka seng, u Roy u la paw ba u la long uwei na ki nonglamkhmat bad u la long u General Secretary jong kane ka seng kaba la seng thymmai.
U la shah jied sha ka ïingdorbar Rajya Sabha ha u snem 2006 bad u la long u nongïalam jong kane ka seng TMC ha ka ïing dorbar ba ha khlieh duh ha u snem 2009, ha kaba u la ïoh ïa ka nam kum u nongpynbeit bad nongweng ïa ki jingeh ba hakhmat duh jong ka seng ha New Delhi.
Ha ka por jong ka sorkar UPA-II, ha ka por ba ka TMC ka dang don ha ka kynhun synrop ka liang synshar, u Roy u la shakri nyngkong kum u Myntri khynnah ka Shipping bad hadien kum u Myntri jong ka sorkar pdeng ha ka tnat Railway ha u snem 2012. La ju nam ïa u kum u “Chanakya” jong ka saiñ hima sima jong ka West Bengal, u Roy u la long bad la tip kum u nongaibuit ba na sha lyndet jong ka seng.
Hadien ka jingjop kaba khraw jong ka TMC ha ka ilekshon sha ka Ïingdorbar Thawaiñ jong u snem 2011 kaba la pynkut noh ïa ka jingsynshar jong ka kynhun Left Front kaba 34 snem, u la don ka bynta kaba kongsan bha ban pynskhem ïa ka jingsynshar jong ka seng ha kylleng ki katto katne ki distrik da kaba pynskhem ïa ka nongrim jong ka jingseng jong ka.
Hynrei ka kam saiñpyrthei jong u ka la mad ruh ïa ki jingïakynad, kynthup ïa ka jingkynnoh ba u don jingïadei bad ka mukotduma jong ka Saradha Chit Fund bad ka Narada Sting Operation.
Ka jingïadei hapdeng u Roy bad ki nongïalam ka TMC ka la nang sniew ha u snem 2017, kaba la pynlong ïa u ban rung sha ka seng Bharatiya Janata Party. La bynshet ïa u ban pynïar ïa ka jingdon jong ka seng BJP ha West Bengal, la ai burom ïa u ba u la ïarap ïa ka seng ban kiew bha hashwa ka ilekshon Lok Sabha 2019, ha kaba ka la jop 18 tylli na ki 42 tylli ki seat jong ka jylla.
U Roy u la shah jied kum u MLA ka BJP na Krishnanagar Uttar ha ka ilekshon sha ka ïingdorbar thawaiñ jong u snem 2021 hynrei u la leit phai biang sha ka TMC tang hapoh katto katne bnai, kaba la pynmih ïa ka jingïakajia ha ka liang ka aiñ bad ka saiñ pyrthei. Hadien kata ka ïingbishar ka la pynduh ïa u kum u MLA katkum ka aiñ pyrshah ïa ka jingphet seng.
Watla u la rung biang sha ka TMC, hynrei u Roy um shym la ïoh biang ïa ka kyrdan kum u riewpaw khmat ha ka saiñ pyrthei kaba u la ju bat mynshuwa bad suki suki u la weng noh ïalade na ka saiñ pyrthei ha ka por ba u dang don ha ka kam namar ba u la don ka jingthut ha ka jingshah ktah ha ka liang ka koit ka khiah.
