Shillong, Rymphang 23
Ka lympung ïalehkai 5th District League T20 Cricket Tournament 2026 ba la pynïaid da ka East Khasi Hills Cricket Association (EKHCA) ka la nangjam shaphrang ha kaba ka Seng Samla Saitsohpen bad ka Superkings CC(Sohïong) ki la khur jingjop ha ka lah sngi U Blei.
Ha ka jingïakhun kaba nyngkong kaba la long ha madan Saitsohpen kaba na Sohra, ka Seng Samla Saitsohpen ka la pynliem noh ïa ka Lumpaïa Avengers da 8 wiket. Ka Lumpaia Avengers kaba l kam trai ban tied nyngkong, ka la kamai 121 run bad shah pynhap 5 wiket ha ki 20 over. U Ibanaibor Lyngdoh u la long u nongtied uba la ïoh bun da kaba kamai 38 run na ki 49 bol. Katba u Ricky Surong u la khur 2 wiket na ka bynta 18 run ha ki 4 over.
Haba wan shimti ïa ka pali kaba ar, ka Saitsohpen ka la lah ban kynjoh sha ka thong da kaba kamai 122 run bad shah pynhap 2 wiket ha ki 13.3 over. U Winningstar u la long u nongtied uba la ïoh bun da kaba kamai 36 run na ki 37 bol. Katba u John Cliff Shabong u la khur 1 wiket na ka bynta 21 run ha ki 3 over. Ïa ka nam Player of the Match la khur da u Ricky Surong.
Haba phai sha kawei pat ka jingïalehkai kaba ar, ka Superkings CC (Sohïong) ka la jop da 4 wiket ïa ka Thynroit CC. Ka Thynroit ka la shimti ban tied nyngkong ha kaba ka la kamai 131 run bad shah pynhap 8 wiket ha ki 20 over. U Kerlang Nongrum u la khyrwit ïa ka shiteng spah kaba 55 run na ki 34 bol. Katba u Bankerlang Syiemïong u la khur 3 wiket na ka bynta 28 run ha ki 4 over.
Haba wan shimti ïa ka pali kaba ar ka Superkings ka la lah ban kynjoh sha ka thong da kaba kamai 132 run bad shah pynhap 6 wiket ha ki 19.1 over. U Wenbestar Syiemïong u la khyrwit ïa ka shiteng spah kaba 58 run na ki 48 bol. Katba u Markynsai Syiemlieh u la khur 2 wiket na ka 20 run ha ki 4 over. Ïa ka nam Player of the Match la khur da u Wenbestar Syiemïong.
Kane ka lympung kan bteng biang ha ka sngi Ba-ar ha kaba ka Marbisu kan ïakhun pyrshah ïa ka Rangshken Area CC ha ka por 8:30 mynstep, katba ka Sportopia ïa ka Cricket Smit ha ka por 12:05 mynsngi.
