Imphal, Rymphang:
Ki bor pahara ha Manipur ki la kem ïa uwei u dkhot ba trei shitom jong ka kynhun ba la shah ñiew beaiñ ka RPF/PLA na ka jaka sah jong u ha Imphal East district ha ka 22 tarik u Rymphang, ha kaba ki la kurup ïa kawei ka Mobile Phone na u.
Une u briew uba la shah kem u dei uba la tip kyrteng kum u Khundom Momocha Meitei ba la tip ruh da ka kyrteng kum u Yaiphaba, (31) jong ka Yourabung Khunou kaba hap hapoh jong ka Lamlai Police Station bad la kynnoh ba u dei uba treikam kum u nongdawa pisa na ka bynta kane ka kynhun.
Ki bor synshar kim shym la pynpaw shuh ïa ki jingtip ba bniah halor ki kam dawa pisa ba la kynnoh, watla ki jingkem briew kumba ki paw ki dang bteng ban pynbor pyrshah ïa ki kynhun lehnoh kiba treikam ha katei ka thaiñ.
Shisngi shwa kane, ki pulit ka Manipur ki la kem ïa uwei u briew uba la suba ba u dei u nongkhaïi drok na Thoubal distrik ha ka jingkhynra kaba kyrpang. U Md. Anash, (29) jong ka Lilong Tharaorok, kaba hap hapoh Lilong Police Station, u la shah kem na ïing jong u ryngkat bad 730 tylli ki bilor Codeine Phosphate Syrup – ka dawai um kaba la pyndonkam bakla bha kum ki dawai pynbuaid ha kylleng ka thaiñ Shatei-lam-Mihngi. Ki jingshah kem ba bud ryntih ki wan hapdeng ki jingpyntreikam ba bteng jong ka kynhun pahara jong ka Manipur ban ïakhun pyrshah ïa ar tylli ki jingma jong ka jingdawa pisa kaba ïadei bad ki lehnoh bad ka jingkhaïi drok be-aiñ, baroh ar ki la buh jingeh la slem bha ïa ka jylla.
