Shillong, Rymphang 23
Ka Jylla ka la ïoh sa kawei ka jingïalehkai kaba dang-thymmai ïa kaba la tip kum ka Meghalaya Rugby Association (MRA) bad ka jingthmu jong kane ka long ban kyntiew ïa kane ka jingïalehkai ha kylleng ka Jylla.
Kat kum ka kyrwoh ba la pyllait da u Sujit Dey, President ka MRA, la ong ba ïa kane ka synjuk la seng ha u snem 2025 bad la pynrung kyrteng hapoh ka Societies Act. Kane ka synjuk ka thmu ban kyntiew ïa ki sap ïalehkai jong ki khynnah, ban pynlong ïa ki jingïakop, bad ban thaw lad ïa ki nongïalehkai ban ïashim bynta ha ki lympung ïalehkai hapoh ka Jylla, hapoh ka ri bad wat shabar ri ruh kumjuh.
Ïa ka jingïalang kaba ar jong kane ka synjuk la long mynta ka sngi U Blei ha Pinewood Hotel, Shillong. Kane ka jingïalang ka long ban pruid dak na ka bynta ban kyntiew ïa kane ka jingïalehkai Rugby ha ka Jylla, kynthup naduh ki khynnah kiba dangkhie dangsan, ban pynlong ïa ki prokram ai jinghikai, ka jingthmu ban pynïar sha baroh ki district, ban pynrung ïa ki synjuk ïalehkai, bad ki lympung ïalehkai ki ban sa long hadien.
Ïa ka Meghalaya Rugby Association la khlieh da u S. Dey, Advocate kum u President. Ïa ka kam Vice President la pynkhamti ha u Bah D. Lamare, D. K. Prasad bad u B. Singh. Kiwei pat ki dkhot ki long u M. Singh kum u General Secretary, Kong Q. Lamare kum ka Joint Secretary, C. R. Marak kum u Treasurer bad u M. Chettri kum u Publicity Secretary.
Te kumta na ka liang ka MRA ka wer ïa ki nongïalehkai kiba don jingthmu, ki coach, bad kiba ïeid ïa kane ka jingïalehkai ba kin wan shakhmat bad ïatreilang ban kyntiew ïa ka Rugby ha ka Jylla.
