Shillong, Rymphang 23
U Superintendent of Police ka East Khasi Hills, Shillong, u Bah Vivek Syiem haba ïadei ka jinglap ïa ka metïap ha khlaw Motinagar u la ïathuh ba mar ïa ïoh jingtip ki pulit ki la leit sha katei ka jaka ban pynlong ïa ka jingtohkit, kaba la shem ba ym don dak mong eiei ha ka met jong utei u briew.
Haba kren sha ki nongthoh khubor u Bah Vivek u la ïathuh ba katkum ka jinglap ha ka jingtohkit, la shem ba ym don kano-kano ka dak mong ha ka met utei u briew bad la ithuh ba u dei u bym don ïing don sem bad ïathuh ruh ba na katei ka jaka ba lap ïa ka met la lap ruh ïa ki plastik kyiad bad la antad ba utei u briew u dei uba kyrni ha ka kyiad.
U Bah Vivek u la ïathuh ruh ba hadien ba la dep ban pynlong ïa ka jingtohkit la pynkit noh ïa ka met sha Civil Hospital Shillong na bynta ban leh ïa ka ‘Post Mortem’.
Shuh-shuh u Bah Vivek u la pyntip ba ki bahaïing hasem jong utei u briew ki la wan mih sha Civil Hospital bad la ithuh ba u dei u Freedy A Nongkhlaw (30 snem) uba shong ba sah ha Laitkor, kumta ki bahaïing ki la pan ïa ka kaiphod ‘Post Mortem’ bad na ka liang ki pulit ki la ‘Register Case’ ïa katei ka jingjia katkum ki kyndon jong ka aiñ.
