Shillong, Rymphang 23
Ki samla pule ka North-Eastern Hill University (NEHU) ha ryngkat ki nonghikai ha ka sngi Nyngkong ki la khap ribbon hi ban plie noh ïa ka khyrdop (Gate I) jong katei ka skulbah kaba la dep tei mynta la lai snem tam eiei khlem da lah ban plie pat.
Ka jingplie hi noh ki samla pule ïa katei ka khyrdop ka long hadien ba ka North-Eastern Hill University Student Union ha ryngkat ka Khasi Student’s Union NEHU Unit ki la dep ban phah jingthoh sha ki bor pynïaid jong katei ka skul bad namar ka jingbym ïoh jubab eiei.
U samla Melamlynti Myrthong President ka NEHUSU, u la ong ba ka union ka la phah jingthoh sha ki bor ba dei peit naduh u snem ba la dep, na ka bynta ban plie noh ïa katei ka khyrdop hynrei ki bor pynïaid kim shym la sngap bad leh eiei lane ban plie noh ïa katei ka khyrdop.
U la ong ba ka jingplie hi noh jong ki ïa katei ka khyrdop ka long ban pynsuk ïa ka rung ka mih jong ki kali shapoh jong ka skulbah bad ba kan long kaba ïaid beit ïaid ryntih, namar ba tang ka Gate-II ka long ka jingkhapngiah ha kaba ka la jia ruh ka jingjia aksiden ha u snem ba la dep.
“Ngim kwah ba kum kito ki jingjia kin dang ïai-bteng hapoh jong ka skulbah bad dei na kata ka daw ba ngi shim ïa kane ka sienjam ban plie hi noh ïa kane ka khyrdop,” la ong u samla Melamlynti.
U samla Roben Nongrem President KSU NEHU Unit, u la ong ba ka jingshna ïa kane ka khyrdop la pyndep lai snem mynshuwa, hynrei tad haduh mynta ba ka la sdang ban bam sarang ruh khlem pat lah ban plie ïa kane ka khyrdop.
“Na ka por sha ka por ngi la phah jingthoh ïa ki bor ba dei peit, hynrei ka jingaidaw bad ka jingpynslem jong ki, ha kaba ha u snem ba la dep ka la don ka jingjia shah tynrah ki ar ngut ki samla pule ka NEHU ha Gate-II,” la ong u samla Roben.
