Shillong, Rymphang 23
Ka Sur U Paidbah kiba hap hapoh u pud u sam jong ka Sohra Civil Sub Division ha ka janmiet jong ka sngi Nyngkong ka 23 tarik u Rymphang 2026, ka la pynlong ka jingthang mom -bati ban sngewlem halor ka jingkhlad kyndit jong u MP ka Shillong Parliamen-tary Konstitwensi u Dr. Ricky A.J Syngkon.
Ïa kane ka jingthang mombati la pynlong ha Lad Thanad, Saitsohpen, Elaka Saitsohpen Sirdarship.
La pynlong ïa kane ka jingïalang bad jingthang mombati ha ryngkat ka jingïatrei lang bad ka bor Shnong Elaka Saitsohpen, Sohra Police Station bad ki Para Nongshong shnong ka thaiñ Sohra Sohra Civil Sub Division.
Ki paidbah nongshong shnong ka thaiñ Sohra baroh kawei ki la wan poi mynta ka janmiet ban pynlong ïa ka jingthang mombati sngewlem.
Ha kane ka janmiet la ïoh ka jingduwai na u pastor, ka jingrwai na ki longkmie, ka jingkren na ki longkmie bad kiwei kiwei de.
Kum ban shu kdew, u Dr. Ricky Syngkon u la khlad noh ha ka janmiet jong ka 19 tarik u Rymphang 2026, ha Dr. H Gordon Roberts Hospital, Jaiaw hadien ba u la kyllon kynsan ha kapor ba u ïalehkai phutbol ha Mawiong bad la pyndep ïa ka jingleh burom khatduh ha ka 21 tarik u Rymphang 2026 ha Nongsder bad la leit ontep ha u lum jingtep ka Balang Presbyterian Sumer.
Haba kren ha kane ka janmiet ki longkpa bad ki longkmie ki la ong ba une u dei u nongïalam ba shisha bad ba sngewrit ha ki liang baroh.
“U Dr. Ricky u dei ruh u mawlynnai jong ka Ri-Khasi, ba tyngshaiñ bad ngi la duh noh hynrei u la buh ïa ki dienjat lyngba u Khulom Ksiar ba ngin ïai pyrto bad ba ngi dei ban bud ïa ka nuksa,” ki la ong.
Ki la pynpaw ruh ba u Dr. Ricky Syngkon u long uba skhem ha ka jingngeit ban shakri khlem da ñiew shilliang la rit ne khraw bad u long uba aiti da ka jingïeid ban len lade kum u shakri paidbah.
