Shillong, Rymphang 23
U Myntri Rangbah ka Jylla u Conrad K Sangma u la pynrem jur ïa ka jingpeit beiñ jaidbynriew kaba la jia ha Malviya Nagar, Delhi ha kaba 3 ngut ki kynthei ka jylla Arunachal Pradesh kila shah kren tohmet bad u la ong, ba kane ka jingleh ka dei ka bym lah ban pdiang satia bad kala buh pynban ar kam shadien ïa ka ri.
“Kane ka jingjia kaba dang shen, ka long ka bym sngewtynnad bad ka bym lah ban pdiang ha kane ka pyrthei kaba mynta. Ki kyntien kiba la pyndonkam bad ka rukom leh ïa ka met ka phad ka long kaba sngewsih bad nga hap ban ong ka long kaei kaei ka bym lah ban pdiang,” ong u Conrad haba ïakren bad ki nongthoh khubor ha ka sngi Nyngkong, ryngkat bad ka ban jur ba ha kane ka ri kaba don kyrhai ki jaidbynriew, ka long kaba donkam ban ïa burom mar kylliang.
U la pynthikna ban leh ïa kaba donkam bad ban ai jingkyrshan ïa kine ki lanot bad u tyrwa ban shimkhia ïa kane ka mat shaduh sha ki kyrdan kiba heh.
“Kumta, nga kyrpad ïa baroh ba kane ka dei kaei kaei kaba ngim dei ban pynshlur, ha ka jingshisha ki paidbah ki dei ban kren pyrshah ïa kane. Nga kyrmen ba ki nongïalam kiba don ha Delhi bad kumjuh ki nongïalam bapher ha kaba ïadei bad ki nongïalam jong ki jaidbynriew ruh kin shimkhia thikna ïa ki sienjam ban pynthikna ba kum kine ki jingjia kin ym jia shuh. Nga pynshlur ban don bun shuh shuh ki prokram ai jingpynsngewthuh ïa ki paidbah ha kaba ïadei bad kum kine ki jingjia bad khamtam eh na ka bynta ki paidbah ka thaiñ shatei lam-mihngi, ngi donkam ban kren shaphang kane ban ïa kyrshan mar kylliang,” la ong u Myntri Rangbah.
“Ki paidbah ki dei ban kren beit. Ngam mut ban ong, ban kren sniew ïa kiwei pat, ka jingkren ka mut ban kyrshan iwei ïa iwei pat, ban pynsngewthuh ïa ki paidbah ki bym lah ban sngewthuh ba kum kine ki jingjia kim dei ban jia,” u la bynrap.
