Shillong, Rymphang 23
U Myntri Rangbah ka Jylla, u Conrad K. Sangma ha ka Lah Sngi U Blei u la ong ba haduh 92 tylli ki shnong ha Meghalaya ki la shah jied hapoh ka Vibrant Village Programme-II (VVP-II), watla ka tnad kam pohïing ka Sorkar Pdeng kam pat pynbna ïa ki tarik jong ka jingpyntreikam.
Ïa kane ka skhim, kaba la thmu lyngba u snem 2028-29, yn khmih da ka tnad Border Areas Development (BAD).
“Ïa ka prokram BAD la pynsangeh noh da ka Sorkar India ha u Nailur, 2022 bad dei hangta ba ka Sorkar India ka la rai ba dei ban wanrah ïa ka prokram thymmai kaba la khot ka ‘Vibrant Village Programme’,” ong u Conrad haba jubab hapoh Ïingdorbar.
U la bynrap, “Ki MLA ki la ïakynduh ïa nga ha kaba ïadei bad ka jingmang ïa katto-katne ka song pisa namar ka jingpynsangeh ïa ka BADP bad nga la pynrung katto-katne ka song pisa, hynrei kam pat biang namarba ngi hap kynthup ïa ki khappud hapdeng ki Jylla bad ki khappud bar-ri kumjuh.”
“Ngin buh katto-katne ka song pisa ban pyntikna ba ïa kane ka jingdonkam la shimkhia…ym lah ban bishar ïa ka roi ka par ha ki thaiñ khappud tang na ka song pisa ba la pynlut hapoh ka BADP,” u la bynrap da kaba kdew ïa ka jingbei pisa jong ka Lafarge SPV na bynta ka Mawsynram bad ka Shella.
U Conrad u la ong ba ki komiti ha ka kyrdan ki distrik ba la bthah da ki kyndon ka Sorkar Pdeng kim kynthup ïa ki MLA – ka jingduna kaba ka Jylla ka la pynsngew sha Delhi.
“Kine ki dei ki bynta ba ïa ka rai ba khatduh dei ban shim ha ka kyrdan jong ka Sorkar Pdeng…ngan sa shimkhia hi dalade ïa kane ka kam,” u la ong.
Ka Jylla ka la mynjur T.14.99 klur na ka bynta ki kam pynroi khappud hapdeng ki Jylla.
