Shillong, Rymphang 23
U Bah Powell Sohkhlet, u Executive Member ba dei khmih ïa ka tnad ka roi ka par ha Khasi Hills Autonomous District Council (KHADC) ha ka 23 tarik Rymphang 2026, u la pynshai sha ki paidbah nongshong shnong ba ka jingslem ki skhim ba ka District Council ka pyllait sha ki kontraktor kiba la pyntrei, ka dei namar ba ki don ki jingthut ha ka liang ka jingpyndap ïa ki kot ki sla namar ka dang dei ka sien ba nyngkong ba kin leh da ka online.
U Bah Powell Sohkhlet u la ong ba kane ka jingpynshai ka dei namar ba um shym la ïoh ban pynshai ïa kane ka mat ha ka dorbar namar uba buh jingkylli um shym la wan ha ka Dorbar mang tyngka.
U Bah Powell u la pynshai ruh ban phah ïa ki bill hap ban ïaid bun tylli ki miej, namar hap ban ïakynduh shuwa ïa ki enjiniar, ki accountant, u EM ba dei peit, EM ka Finance bad kiwei bad ïa kine ka shim por haduh kumba 15 sngi ei-ei. U la ong ruh ba hapoh ka Executive Committee ym don ka jingleh shilliang khmat ïa kano-kano ka Konstitwensi bad haduh mynta, sah sa tang 24 tylli ki kam kiba don kumba T.1 klur tam ka ban sa siew noh shen.
“Ka don ruh ka jingbakla ha ka rukom pyndap ïa ki kyrteng ha ka ‘work order’ kumta hap ban pynkylla ïa kita baroh hashuwa ban phah sha ka Sorkar Pdeng,” u la ong.
U la ïathuh ba ka EC ka la trei shitom naduh ba sdang bad kam don kano-kano ka jingthmu ban pass tang ïa ki bill jong kiba ithuh hynrei kan nym leh shilliang khmat hynrei kan leh kumjuh beit ïa baroh.
U la pynshai halor ka jingkynnoh ba ka Executive Committee (EC) kam pat lah ban pyllait skhim wat la ka la ïaid shisnem ba ka la don ha ka bor. Kumta u la kyntait ïa kine ki jingkynnoh da kaba ïathuh ba ka tnad ka la ïaid shaid-shaid ban pynbiang ïa ki kam pynroi lyngba ka 15th Finance Commission (2021-2026).
Shuh u ong ba haduh mynta na ka liang ka tnad ka la pdiang kumba 2457 tylli ki skhim na ki konstitwensi bapher-bapher, kiba kynthup ïa ki 1425 tylli hapoh ka Tied Scheme (ba shongdor T.34 Klur tam) bad 1022 tylli hapoh ka Untied Scheme (ba shongdor T.22 Klur tam), kine kiba kynthup ki jaka saitjaiñ, ki madan phutbol bad kiwei kiwei de.
“Ban pynbeit ïa kane, ka EC ka la leit hi haduh Nongbah Delhi ban kynduh ïa ki Myntri Sorkar Pdeng ban pynsngew ïa ki jingeh kiba mih na ka jingthung online. Hadien ka jingpynbiang ïa ki Audit Online, ka Ministry ka la pynlait noh ïa ka Second Installment kaba T.12 klur tam na ka bynta u snem 2021-22,” La ïathuh u Bah Powell.
“Ka EC kam shym la shongkli kti, hynrei ngi la trei shitom ban buddien ïa ka EC kaba rim bad khamtam eh ban pynjanai, ban pynbha ïa kane ka kam 15 Finance Commission. Kine ki skhim kiba la tyrwa na baroh ki MDC kidei na ka bynta ki shnong ki thaw ym na ka bynta ban treikam hapoh ka District Council,” u la bynrap.
“Namarkata, lada ka Sorkar Pdeng kam lah ban pdiang ïa kine ki jingtyrwa hapoh ka por kaba biang, ka EC kan hap ban ap noh sa ïa ka 16th Finance Commission, hynrei ka jingkyrmen ka long ba baroh kin ïaid ryntih noh hapoh kane ka 15th Finance Commission,” u la ong biang.
Shuh shuh u Bah Powell u la kyntu ïa baroh kiba ïoh ïa kane ka skhim, kiba thymmai kiba rim ruh ban ïatrei ryngkat bad ka District Council khnang ba ka pisa ba la ïoh na ka Sorkar Pdeng kan nym lehnohei.
