Shillong, Rymphang 23
Ka Shillong Lajong FC ka la soi ïa u Overkindness Lyngdoh Mawnai bad u Manbhakupar Ïawphniaw na ka bynta ban shim bynta ha ka Indian Football League 2025-26, la pynbna kane ka klob ha ka lah sngi U Blei.
Kine ki ar ngut ki rangïalehkai ka Jylla ki la long napdeng ki san ngut kiba kane ka klob ka nongbah ka la soi, kiba kynthup ïa u Jakob Vanlalhlimpuia, Lamlallian Vaiphei bad u Abelson Jachi.
Ïa katei ka lympung yn sdang naduh 27 tarik bad ka Shillong Lajong kan pynkhreh ïa ka jingïa-lehkai kaba nyngkong ha la ïing pyrshah ïa ka Rajasthan United ha ka 1 tarik u Lber. Kumta kane ka klob ka la pynkhlaiñ ïa ka kynhun ïalehkai da kaba wanrah ïa kitei ki rangïalehkai.
Kumba ka paw u Overkindness bad u Manbhakupar ki dei kiba la ju mlien ban ïalehkai. U Overkindness uba dei u rangïalehkai ‘dien, u la mihkhmat ïa ka kynhun ïalehkai ka Jylla kumjuh ïa ka Mawlai SC bad ka Nangkiew Irat SC. Ha ka aïom ba la lah u la ïalehkai na ka bynta ka Peerless ha ka Calcutta Football League.
Katba u Manbhakupar, uba dei u rangïalehkai shakhmat, u la ïalehkai na ka Rangdajied United, watla u la paw na ki klob kiba nabar jylla kum ka NEROCA, FC Bengaluru United bad ka Kickstart FC na Karnataka.
Kitei kiwei pat kiba ka Lajong ka la soi ki long u Jakob kum u rangïalehkai shakhmat, katba u Lamlallian bad u Abelson kum ki rangïalehkai shapdeng.
Ha kane ka rukom pynïaid ïa ka IFL mynta ka aïom ka la long kaba kham pher. Ha ka wat kaba nyngkong (single-leg round-robin) ka ban ïakhun hapdeng ki 10 tylli ki kynhun. Ki san tylli ki kynhun kiba la wan kham shakhmat kin ïakhun haïing bad shabar na ka bynta ka Championship Round, katba kiwei pat ki san tylli ki kynhun kin hap ban ïakhun ïa ka Relegation Round, ki ban pynlong tang ha kawei ka jaka.
Ka kynhun ka ban khur jingjop ha ka Championship Round kan kiew kyrdan sha ka Indian Super League, katba ki ar tylli ki ban wan ha ki kyrdan ba shatrai na ka Relegation Round kin shah pynhiar sha kawei pat ka kyrdan kaba kham hapoh (ba tip mynshwa kum ka I-League 2) ha ka aïom ban wan.
