Shillong, Rymphang 23
Ka West Indies ka la pynliem noh ïa ka Zimbabwe da 107 run ha ka Super 8 jong ka T20 World Cup kaba la long ha ka lah sngi U Blei ha Wankhede Stadium kaba ha Mumbai.
Kane ka jingjop ka la long ka jingkyrmen na ka bynta ban ïoh rung sha ka semi final na ka Group-1 ryngkat ka South Africa, katba ka India ka la don ha ka jingduh jingkyrmen na ka daw ba ka la mad ïa ka jingshah rem kaba nyngkong ha kane ka kyrdan ïalehkai.
Haba phai sha kane ka jingïakhun, ka West Indies ka la lah ban pynpaw ïa ka jingtbit hadien ba ka la shimti ban tied nyngkong ha kaba ka la kamai haduh 254 run bad shah pynhap 6 wiket ha ki 20 over.
Kane ka la wan lyngba ka jingïalehkai bha u Shimron Hetmyer u la long u nongtied uba kynsai ha kaba u la lah ban kamai haduh 85 run na ki 34 bol, kaba kynthup lang ïa mar 7 tylli ki ‘six’ bad ki ‘four’. Kumjuh u Rovman Powell u la ïoh 59 run na ki 35 bol, kynthup lang ïa mar 4 tylli ki ‘six’ bad ki ‘four’.
Haba wan beh ïa ka thong ka Zimbabwe ka la shem jingeh ha ka pali tied na ka daw ka jingtbit ki nongkawang bol ka West Indies ha kaba ki la lah ban pynhap wiket ïa baroh ki nongtied. U Gudakesh Motie u la khur 4 wiket, kumjuh u Akeal Hosein u la ïoh 3 wiket nalor u Matthew Forde uba la ïoh 2 wiket. Te kumta ha kaba kut ka Zimbabwe ka la kamai tang 147 run ha ki 17.4 over. U Brad Evans u la long u nongtied uba la ïoh bun da kaba u la kamai 43 run na ki 20 bol.
Ka jingïalehkai jong ka Group-2 ha ka sngi Ba-ar kan long hapdeng ka England pyrshah ïa ka Pakistan.
