Shillong, Rymphang 24
Ha ka janmiet jong ka 23 tarik u Rymphang 2026, ka Khasi Students’ Union (KSU) Laban Circle ka la lap bad bat ïa ki 15 ngut ki briew ki bym dei ki trai jylla, kiba dei ki Muslim, kiba la sah beaiñ khlem ki kot ki sla kiba biang bad khlem ka jingtip lane ka jingmynjur jong ka Dorbar Shnong.
Ha ka kyrwoh ba la phah da u Samla Shiningstar Chyne, General Secretary KSU Laban Circle u la ïathuh ba kine ki Muslim ki wan shane ban ïoh bylla bad ki sah ha kawei ka ïingwai ba 2 kamra ha Laban.
Katkum ka jinglum jingtip na ka liang ka seng, ïa kane ka ïingwai la ai sha 2 ngut ki briew ki bym shym la sah shuh shane ha ki bnai ba la dep bad kine pat ki ai pateng ha kine ki 15 ngut ban shong beaiñ khlem ka jingtip jong ki trai ïing ne ïoh jingbit na ka shnong, u la ong.
U la ong ba na ka liang ka seng ka la kyndang mardor ïa kane ka ïing bad pynmih lut ïa baroh kine ki 15 ngut ba wan buhai shnong bad pynkit ïa kine da ka kali sha Assam.
“Ka Seng lyngba kane ka kyrwoh ka kwah ban pynkynmaw biang sa shisien ïa baroh ba katkum ka jingïalang ba la shong da ka seng bad baroh 7 tylli ki Dorbar Shnong ba kynthup hapoh ka Raid Laban Dorbar Pyllun bad Dorbar Shnong Lawsohtun ha ryngkat ka jingïadon lang ki pulit jong ka thanad Laban ha 05 tarik u Nailur, 2025, ka la shim ïa ka rai ba nym shah shuh ïa ki bar jylla ban ïoh wai ïing hapoh kine ki Dorbar Shnong khlem da ïoh jingbit bad jingpynskhem na ki Dorbar Shnong,” la bynrap u Samla Shiningstar.
Nalorkata, ka KSU ka maham jur ba ki trai ïing ki dei ban burom ïa kane ka rai bad kim bit ban leh pyrshah da kaba ai wai ïa ka ïing ka jong ki sha ki bar jylla. Lada lap nangne sha khmat ki trai ïing kin hap ban bahkhlieh hi ïa kaei ka ban sa jia lada ki dang ïai ai wai ïing ïa ki bar jylla hapoh u pud u sam jong kine ki 8 tylli ki Dorbar Shnong.
