Shillong, Rymphang 24
Ha kine ki por kiba mynta ka ktien Khasi ka la jan duh jait namar kiba bun ki Khasi kim ju pyndonkam shuh ban kren ïa ka ktien lajong hynrei ki pyndonkam ban kren da ki ktien nongwei.
Lah ban kdew ruh ba ka ktien Khasi mynta ka la don ha u laiñ jong ka jingduh jait namar bun kim ju kwah shuh ban pyndonkam ban kren la ka long ha kino-kino ki bynta, hynrei ka ktien Khasi ka dang don jingkyrmen namar ki samla pule ki dangshim bad pule ïa ka ha ki jaka pule.
Kumba ong ka Kyntien, “Lada im ka jaitbynriew im ka ktien”.
Ban pynneh ïa ka ktien Khasi, na ka liang ka Khasi Department Shillong College ha ka 24 tarik u Rymphang 2026, ka la rakhe ïa ka “Tien Nongmei Salonsar” kaba la long ha Auditorium jong ka Kolej.
Haba kren ha kane ka sngi na ka liang u Dr.A.W Rani uba dei u riew shemphang u la ong ba ka ktien Khasi mynta ka la don ha u laiñ jong ka jingma namar ki Khasi kim ju pyndonkam shuh ban kren ïa ka ktien lajong hynrei ki kren beit da ka ktien nongwei.
“Lada ïa ka ktien Khasi la pyndonkam ban kren tang da ki tymmen la thikna ba ka ktien Khasi kan sa jah bad duh jait syndon,” u la ong.
Shuh shuh u la ong ba ka ktien Khasi haduh mynta kam shym dei ka ktien Sorkar ne ka office language, da kaba pynkynmaw ruh ba ha u snem 2005 la pynbna ïa ka ktien Khasi kum ka ‘associate official language’ jong ka Sorkar hynrei haduh mynta kam pat dei ka Ktien Sorkar ba pura.
Kumta u la kyntu ïa baroh ki samla ba ki dei ban sarong ban kren ïa la ka jong ka ktien namar lada im ka ktien im ka jaitbynriew baroh kawei.
Na ka liang ka Dr. B Khyriem pat ka la pynshai sha ki samla halor ka jingrakhe ïa ka ‘Tien Nongmei Salonsar’.
“Lyngba kane ngi donkam ban ïada ïa ka ktien bad ba ki samla kin pyndonkam ha ki jaka pule ïa ka ktien. Ka jingrakhe ïa kane ka ‘Tien Nongmei Salonsar’ ka buh ïa ki samla hapdeng eh jong ka jingïakren namar ha ki jaka pule ki samla kim dei tang ki nongshah hikai hynrei ki dei ka nuksa ban kren ïa ka ktien” ka la bynrap.
Ka la ïathuh ruh ba ïa kane ka jingrakhe la dei ban rakhe ha ka 21 tarik u Rymphang 2026 hynrei na ka jingkhlad noh jong u MP ka Shillong u Dr. Ricky Syngkon kumta la hap ban pynsangeh noh kum ka jingburom bad jingsngewlem.
