Shillong, Rymphang 24
Ka Kynhun Myntri ka Sorkar Jylla kala ai jingmynjur ïa ka Indian Institute of Public Health Shillong (IIPHS) Bill 2026, kaba plie lynti ïa kane ka jaka pule ba kan ïoh jingithuh kum ka kyrdan University.
Haba pynbna ïa kane hadien ka jingïalang bala pynïaid da u Myntri Rangbah Conrad K Sangma ha ka sngi Ba-ar, u Myntri ka Koit ka Khiah Bah Wailadmiki Shylla u la ong, “Kane kan long kum ka jaka pule ba kongsan na ka bynta ka thaiñ Shatei Lam-Mihngi, ka lah ban sei ïa ki nongtrei ka koit ka khiah ym tang ha Jylla hynrei ha ka thaiñ shatei lam-mihngi baroh kawei”.
Ka IIPHS, ka Public Health Institution ba marwei ha ka thaiñ, kan lah ban ai degree sha ki public health scholar ha ka kyrdan University.
U Myntri u la pynpaw ïa ka synñiang jong ka IIPHS ha ka kam wad bniah, ai jinghikai bad ki jingïarap bala pynshong nongrim na ki jingkheiñ, haba kdew ïa ki kam jong ka ha ka jingai jinghikai ha ka Cardiopulmonary Resuscitation (CPR), ka jingartatien ban ai injek bad kiwei kiwei.
U Bah Wailad u la pyntip ba ka University kan treikam da ka jingkyrshan nalade ïalade bad kan kyrshan ïa ka Sorkar Jylla ha ka ban pynmih ïa ki nongtrei kiba lah ban trei ïa ki kam haba mih ki khep ba kyrkieh kum ka COVID-19.
Kane ka sienjam ka dei kaba la leh halor ka jingïohi ïa ka jingdonkam ki jaka pule ban pynleit jingmut ha ki kam wah bniah, khamtam hadien ka jingkhlad noh u MP Dr Ricky AJ Syngkon.
Ha kajuh ka por, ka Kynhun Myntri kala ai jingmynjur ruh ïa ki katto katne ki projek ba kongsan bad ki jingpynkylla ïa ki policy, kynthup ka jingpynjlan ïa ka jingaiwai ba 30 snem ïa ka Orange Root Restaurant ha Sohra bad ka policy kyntiew kyrdan ïa ki nongtrei Anganwadi.
U Bah Wailad u la pynbna ruh ïa ki jingmynjur, kiba kynthup ïa ka jingpynwan dur thymmai ïa ka rukom siew bai wai ha ka dur jong ka PPP model na ka bynta ka Orange Root bad NoC ban shna pynheh bad pynbha ïa ki jingtei ha ka Eco Resort Nongkhlaw.
Ka Kynhun Myntri kala ai jingmynjur ruh ïa ka Meghalaya State Policy for Promotion of Anganwadi Workers sha ki Supervisor.
