Shillong, Rymphang 25
Ka Sorkar Jylla ka la nang kyntiew bad pynbha ïa ka koit ka khiah, da kaba tei ïa 51 tylli ki jaka sumar bad kyntiew kyrdan ïa 554 tylli kiwei pat ha kine ki 8 snem ba la dep, pynbna u Myntri Rangbah ka Jylla, u Conrad K. Sangma ha ka Sngi Balang.
“Ngi la bei tyngka shibun ha ka koit ka khiah,” la ong u Conrad haba jubab ïa ka jingïatai halor ka Mang Tyngka hapoh Ïingdorbar.
“La pyndap 772 tylli ki jingthiah ha ‘hospital’, la kynthup 479 ngut ki doktor ba la pyntbit kyrpang lem bad ki doktor lyngba ka MMSRB; 76 ngut ki doktor la ai jinghikai ban long kiba la pyntbit kyrpang bad la pyntreikam ïa 6700 tylli ki ‘Village Health Council’ (VHC).”
U Myntri Rangbah ka Jylla u la kubur ba wat hapdeng ka jingkiew, hynrei dang donkam shuh ban leh, khamtam ha ka ‘Safe Motherhood Programme’.
“Ka dang don shibun kaba (dang) donkam ban leh bad ngi pynleit jingmut halor kane,” u la ong.
