Shillong, Rymphang 25
Ka ïingbishar Meghalaya High Court kala bthah ïa ka Sorkar Jylla ba kan tohkit ïa ka jingdon jingïadei hapdeng ki nongshalan bad ki nongthied ïa ki dewïong beaiñ kum shibynta jong ka kyndon treikam ka Judicial Enquiry Commission.
Kane kala mih kum ka jingbuddien ïa ka jingbthei ka par dewïong ha Mynsngat-Thangsko, East Jaiñtia Hills, kaba la shim jyndat ïa ka mynsiem ki 33 ngut ki briew.
Ha ka hukum ba pynmih ha ka sngi Ba-ar, ka Division Bench ba kynthup ïa u Justice HS Thangkhiew bad Justice W Diengdoh, kila kdew ba watla ki kyndon treikam jong ka Commission ki paw ba ki don bun bad ba bniah, hynrei kam don satia ka kyndon ban tynrong ïa ka jingkitkhlieh ha ki briew kiba donkti lane ki bor ba dei khmih.
“Haba phai sha ka jingthaw ïa ka Judicial Enquiry Commission, ki kyndon kiba la buh, watla ki paw ba ki don bun bad bniah, kaba donkam ka long ka jingaiti ïa ka kaiphod jingshem ba bniah halor ki kam bad ki jingleh bakla jong ki briew lane ki bor khmih, hynrei, ym shym la kdew satia kano kano ka jingtynrong ïa ka jingkitkhlieh ha kine ki briew lane ki bor khmih khnang ban lah ban leh eiei pyrshah ïa ki katkum ka lynti ka aiñ,” ong ka ïingbishar.
Ka ïingbishar kala bthah ruh ïa ka jingdonkam ban tohkit halor ka jingïadei hapdeng ka jingshalan bad ka jingdawa ïa u dewïong beaiñ, haba pynpaw ba “kan ym don ka jingtih beaiñ lada ym ai ding da ka jingdawa, kaba pynlong ïa kane ka kam kaba ma ba kan ïohnong bha”.
“Ngi don ka jingsngew ba ka long kaba donkam ba ka Sorkar Jylla kan kynthup ïa kane ka kyndon treikam ha ka jingtohkit,” bynrap ka ïingbishar.
Haba ïadei bad ka Special Investigation Team (SIT) bala thung ban tohkit ïa ka jingjia ha par dewïong ha Thangsko, ka ïingbishar kala khmih bniah ïa ki kyndon treikam bad pynpaw ïa ka jingsngewhun bad ka jingkular bala ai da u Advocate General ba u heh ophisar ba kham rangbah duh un khlieh ïa ka kynhun.
Ka ïingbishar kala shong bishar ruh ïa ka kaiphod halor ki kam bala leh pyrshah ïa ka jingtih dewïong beaiñ, khamtam namar ka jingjia ha Thangsko- bad ban jur ïa ka jingdonkam ban pynbteng ïa ki jingpyrshang ha ban tehlakam ïa ka jingtih dewïong beaiñ ha ka Jylla.
Kane ka kaiphod ka pyntip ïa ki ejahar bala register, ka jingkem ïa ki briew, ka jingkurup ïa u dewïong beaiñ, ki tiar pynbthei bad ki tiar ba pyndonkam ban tih par. Hynrei, ka ïingbishar ka sngew ba ki dang don shibun kiei kiei kiba hap leh ban pynbeit ïa kane ka kam.
U Advocate General u la kular ïa ka ïingbishar ba ka Sorkar kan sa nang shim shuh shuh ïa ki sienjam halor kane bad ïa kane ka kam la buh ban bishar biang bad ban nang pynmih hukum ha ka 5 tarik Lber, 2026.
U Superintendent of Police ka East Jaiñtia Hills District, Pankaj Rasgania bad Superintendent of Police barim ka East Jaiñtia Hills Vikash Kumar, la bthah ba ki dei ban don biang ha ïingbishar ha ka sien shong bishar ban wan.
