Ranchi, Rymphang:
Kum ka jingïakhun ban lah ban tehlakam ïa ka jingklang jong ka ding ha kylleng ki jaka khlaw jong ka jylla, ki heh ba dei khmih ïa ka tnat khlaw ki la buh jingmut ban buh kawei ka kynhun kaba thymmai na ka bynta ban lah ban pyntreikam shakhmat bad ban lah ban tehlakam ha ka por ba biang ïa ka jingpur jong ka ding lada wan jia ki jingpluh khlaw.
Kum shi bynta jong kane ka jingpyntreikam, la pynrung kyrteng haduh 28,000 ngut ki nongshong shnong kum ki “Fire Warriors” khnang ba kin lah ban ai jingïarap ha kano kano ka por ba don ki jingjia pluh khlaw bad la buh da ka WhatsApp Group khnang ban lah ban ai jingtip kyrkieh sha ki ha kum kine ki jingjia khnang ban ïoh ïa ka jingïatreilang.
Ka tnad khlaw ka thmu ban pynïar ïa kane ka jingïadei kam jong ki nongshong shnong sha ki 50,000 ngut ki nongïashim bynta.
Ki tyllong khubor ki la ïathuh ba ka jingthmu mynta u snem ka long ban pynkhlaiñ ïa ka jingïashim bynta jong ki paidbah, ha kaba ki nongshong shnong kin shah hikai ha ki rukom ban khanglad ïa ka jingpur bad ki buit pynlip ding.
Ïa ki dkhot ba la jied yn pynkhreh kum ki nonghikai ba tbit ban pynïar ïa ka jingtreikam.
Ki jaka khlaw ki dang long kiba lah ban shah ktah ha ka ding naduh u bnai Rymphang haduh shwa ban sdang ka aïom slap, bad yn pynneh ïa ka jingpeitngor kaba kyrpang ha kane ka por.
Kane ka tnad kan ïatreilang bad ka sorkar India, ka tnad Disaster Management bad ki nongshong shnong.
La pynlong ïa ki jingïalang pynsngewthuh paidbah ha ki skul, bad la pynrung ïa ki nongmihkhmat paidbah ha ka jingïalap.
La bthah ïa ki heh sorkar ban pynkhreh ïa ki plan treikam ha ka kyrdan jong ka distrik bad ban pynneh ïa ka jingïadei kaba beit bad ki nongshong shnong.
La pynlong ïa ka jingïalang bishar bniah bad ki ophisar ba dei khmih ïa ka tnat khlaw jong ki thaiñ bad ki bynta ba shah phiah dang shen. Yn pynlong ïa ki jingpyni drama ha surok bad ki Prabhat Pheris ha ki lynti synkien ba ïalam da ki samla pule ban pynsaphriang ïa ka jingtip sha ki briew kiba sah hajan ki jaka khlaw khnang ba kin tip kumno ban leh ban khanglad ïa ka jingpur jong ka ding.
Shuh shuh la ong ba yn pyndonkam da ki Drone bad ki Satellite katkum ki rukom pyntreikam khnang ban lap kloi ïa ki jaka ba don ka jingpluh.
Ki Control Rooms kin treikam baroh shisngi haman ki distrik bad ki thaiñ bad yn buh ruh ïa u toll-free ban ïoh jingtip halor ki jingjia pluh ding.
Yn sa buh lypa ruh ïa ki kynhun pynlip ding haman ki jaka kiba jngai 10 haduh 20 meter ban khanglad ïa ka jingpur sted jong ka ding.
Kumba la sakhi, la ong ba ki jingjia jong ki jingpluh khlaw ha ka jylla ki la kiew da 16 percent ha kine ki snem ba la dep, ha kaba u Lber bad Ïaïong ki la long ki bnai kiba kham shah ktah jur.
Ki khlaw ki btap ha West Singhbhum ki dei kiba shah ktah jur bha kumba la sakhi.
Hapdeng u snem 2001 haduh u snem 2025, palat 10 percent ki dieng ha ka jylla ki la julor na ka jingpluh ding.
Kumba la khmih lynti, la ong ba kane ka jingthmu pyntreikam kan sa long ka jingmyntoi khamtam ïa ki nongshong shnong kiba sah hajan ki jaka khlaw bad ha kajuh ka por ka jingshngaiñ na ka bynta jong ki lada jia ka jingpluh khlaw.
