Ka jingkren kynthoh kaba dang shen kaba la kren da u Sunil Deodhar uba dei u nongïalam ka BJP bad ruh uwei na ki dkhot jong ka RSS ha kawei ka jingïalang ha Pynter ban pynjah burom ïa ki paid Khristan, ka la long ka jingkren kaba la pynmong ïa ka jingsngew jong ki jaitbynriew Khristan ha Meghalaya. Kum ïa kine ki jingkren kynthoh ym dei satia ban pdiang namar ym tang ba ki thmu ban pynjah burom ïa ki Khristan hynrei ka thmu ruh ban wanrah ka jingïapait ïapra hapdeng ki nongshong shnong.
Kane ka jingkren jong u Sunil Deodhar kaba la saphriang ha ki rynsan social media, ka la pynlong ïa kiba bun ki seng ban pynrem jur bad ruh ban dawa ba dei ban pynshitom da kaba tyngeh pyrshah ïa utei u briew. Ki seng saiñ pyrthei naduh ka BJP, NPP, Congress, NCP ki la pynrem jur halor kane bad dawa ruh ban leh da kaba tyngeh. Ngi ïohi ba ka HITO ruh ka la leit ban ujor da ka ejahar pyrshah ïa une u briew bad na ka liang jong ka HYC ruh ka la leit ban pynpaw ka jingpyrshah hakhmat ka ophis treikam jong ka BJP bad ban thang syndon ïa u tyngshop jong utei u dkhot jong ka RSS.
Kum ha kane ka por ba ka India ka sngew sarong ba ka dei ka ri synshar paidbah kaba don bun ki jaitbynriew, ki jingkren kiba paw ba ki thmu ne pynjah burom ïa ka jaitbynriew rit paid ha ka niam kim dei tang ki bym stad ha ka saiñ pyrthei; ki long kiba pynsniew ïa ka imlang sahlang. Ka Riti Synshar jong ka ri India ka pynthikna ïa ka jinglaitluid ha ka niam bad ka jingïaryngkat hakhmat ka aiñ. Ka jinglong jong ka ri ka la shong slem bha ha ka jingim lang – ka jingdeng ba la shna na ki Hindu, ki Muslim, ki Khristan, ki Sikh, ki Buddhist, ki Jain bad kiwei kiwei ki rukom. Kano kano ka jingkren beiñ kaba pynïakhlad ïa kawei ka jaitbynriew ka don ha ka jingma ban pyntlot ïa kata ka nongrim. Kam dei tang shaphang ki jingsngew ba la pynmong; ka dei shaphang ka jingpynneh pynsah ïa ka jingshaniah hapdeng ki nongshong shnong.
Ki jingkynthoh jong ki paidbah halor ki jingkren jong u Deodhar – kynthup ïa ki jingkynthoh na ki kynhun sengbhalang bad ki jingkhot ban pynshai – ki pynpaw ïa ka jingbym lah shah kaba nangroi ïa ka saiñ pyrthei kaba pynïapher. Ha ka juk digital, ha kaba ki jingkren ki saphriang mardor bad ki jingsngew ki nang kiew stet, ka jingkitkhlieh ka nang kham kongsan shuh shuh.
Hynrei kane ka khyllipmat kam dei ban kylla long ka jingpynbyrngia jong ki nongïalam. Ha ka jaka kata, ka dei ban pynlong ïa ka jingpyrkhat kaba kham jylliew shaphang ki jinglong kiba ngi khmih lynti na kito kiba don ha ki kam paidbah. Ka jingbym ïasngewthuh ne bym ïamynjur ha ka saiñ pyrthei ka dei kaba don beit ha ka synshar paidbah; hynrei ban kren pynïapher jaidbynriew kam don satia. Kumta kum ki nongïalam ki dei ban pynïapher hapdeng ka jingïatai halor ki nongrim ka jong ki ym ban kren beiñ bad kren thmu pynpait ïa ka imlang sahlang.
Kum ïa kine ki briew, ka aiñ ka dei ban leh da kaba tyngeh khnang ba kan long pat ka nuksa ïa kiwei ba kin kiar na kum kine ki jingkren kynthoh pyrshah ïa kiwei ha ka kyrteng jong ka niam. Ngi don ha ka ri kaba ngi ïoh ban mane laitluid la ngi don ha kano kano ka niam kam pher. Kam pher la ngi don ha kano kano ka niam, hynrei ngin im bad tylli kum kawei ka ïing.
