Shillong, Rymphang 25
Ka Jylla kala khreh ban sakhi ïa ka jingkiew ba khraw ha ka jingkynshew kam ki riew shimet, bad ka Sorkar ka khmih lynti ïa ka jingwan tuid ka pisa ba T.5600 klur ha ki snem ban wan, pynbna u Myntri Rangbah ka Jylla Conrad K Sangma ha ïingdorbar ha ka sngi Balang.
“Ngi khmih lynti sa T.2638 klur ban sa shim rai shen. Hapoh kine ki ar snem ban wan, ngin ïoh jan T.5600 klur ka jingkynshew kam ha Jylla, ïa kaba ngi khmih ba kan plie ïa ka lad aikam aijam haduh 5500, bad bun na ki, kin dei ha ka jingpdiang ïa ki briew ba nabar (hospitality),” ong u Conrad haba jubab ïa ki jingïatai halor ka mang tyngka ha ïingdorbar.
U Myntri Rangbah u la pynpaw ïa ka jinglah ka Jylla ban kyntiew ïalade ha ka kam thung siej, haba pyntip ïa ka jingwad bniah bala leh da ka MBMA.
“Ka MBMA kala pynlong ïa ka jingwad bniah halor ka kam thung siej kiba don ha Meghalaya. Haba ki pule ïa ka kaiphod, kila kmen bha namar ki jait siej ba ki wad ki dei kiba shem ha Meghalaya bad kane kan plie ïa ka lad kynshew kam ba jan kot T.2000 klur hangne,” u la ong.
U Conrad u la bynrap ba ka Sorkar ka dang shu sdang ruh ban ïakren bad ki nongkynshew kam kiba lah ban seng kam, ka ban nang plie lad shuh shuh ïa ki nongrep trai shnong.
