Shillong, Rymphang 25
Ka Seng Samla Saitsoh-pen ka la pynliem noh ïa ka Mawmluh CC da 6 wiket na ka bynta ban khur ïa ka jingjop ha ka 5th District League T20 Cricket Tournament 2026 ba la pynïaid da ka East Khasi Hills Cricket Association ha ka sngi Balang.
Ha kane ka jingïakhun kaba la long ha madan Saitsohpen kaba ha Sohra, ka Mawmluh ka la kam trai ban tied nyng-kong ha kaba ka la kamai 118 run bad shah pynhap 9 wiket ha ki 20 over. U Aiban Tyngshaiñ Rajee u la long u nongtied uba la ïoh buh da kaba u la tied 20 run na ki 21 bol. Katba u Dame Kharmalki u la khur 3 run na ka bynta 26 run ha ki 4 over.
Haba wan shimti ïa ka pali kaba ar, ka Seng Samla Saitsohpen ka la lah ban kynjoh sha ka thong da kaba kamai 119 run bad shah pynkhyllem 4 wiket ha ki 13.2 over. Kane la wan lyngba ka jingïalehkai bha u Mebankyrshan Allya uba la lah ban kamai ïa ka shiteng spah kaba 75 na ki 29 bol. Katba u Dakerlang Sohkhlet u la khur 2 wiket na ka bynta 18 run ha ki 3 over. Ïa ka nam Player of the Match la ïoh da u Dame Kharmalki.
Haba phai sha kawei pat ka jingïakhun kaba ar, ka Sohra Police Combine ka la jop da 80 run ïa ka Saitsohpen Veteran Legend. Ka Sohra Police Combine kaba la jied ban tied nyngkong ka la kamai 187 run bad shah pynhap 5 wiket ha ki 20 over. U Rector Ïawim u la lah ban pynpaw ïa ka jingtbit ha kaba u la khyrwit ïa ka spah run kaba 109 na ki 59 bol. Katba u Habaïoh Riahtam u la khur 2 wiket na ka bynta 16 run ha ki 2 over.
Haba wan beh ïa ka thong, ka Saitsohpen Veteran Legend ka la kamai tang 107 run bad shah pynhap 6 wiket ha ki 20 over. U Ivan Maxwell u la tied 24 run na ki 30 bol. Katba u Bantiplang Kharshiing u la khur 3 wiket na ka bynta 20 run ha ki 4 over. Ïa ka nam Player of the Match la khur da u Rector Ïawim.
