Imphal, Rymphang:
Ki bor pahara ha ka sngi Ba-ar, ka 24 tarik, Rymphang, ki la lap ïa ka jaka buh ïa ki tiar ïaleh, ki kuli bad ki tiar ïada ha ka por ba don ki jingkhynra ha Manipur Imphal East District.
Ïa kine ki tiar la lap na ka thaiñ Nungai Hill Range kaba hap hapoh u pud u sam jong ki pulit ka Sagolmang Police Station ha Imphal East District hadien ka jingïatreilang jong ki bor pahara.
Katkum ka jingïathuh jong ki tyllong khubor ba la ïoh lum, la ong ba ki tiar kiba la ïoh kurup ki kynthup ïa kawei ka suloi shna hi ha kane ka ri, kawei ka pistol 9mm shna hi ha ryngkat ki kuli bad uwei u bom kawang kti HE-36. Kum ban bynrap shuh shuh, la ong ba la lap ruh ïa ki song jong ki kuli .303 na ka jaka ba la pynlong ïa ka jingleit khynra.
Ki bor pahara ki la kurup ruh ïa kawei ka jaket ba la buh da ki ar tylli ki pliang nar, kawei ka pla thep kuli, ar tylli ki Bulletproof helmet, bad lai tylli ki Sling, ha kaba kine ki tiar ba la ïoh ban kurup ki la pynpaw shai ba ki la long ki tiar ba ju pyndonkam haba don kino kino ki jingleit khynra jong ki kynhun shipai bad ki jinghiar thma pyrshah ïa ki.
Ka jingleit khynra jong ki shipai ha kane ka thaiñ kan dang ïai bteng khnang ban lah ban pynkut noh ïa ki kam pyntriem jong ki riewkieng atiar ha kylleng ki jaka jong ka jylla khamtam lada jia kino kino ki jingjia ïakynad.
