Shillong, Rymphang 25
Ka jingïaid lynti ka Sri Lanka ha ka T20 World Cup ka la poi sha kaba kut, hadien ba ka la mad ïa ka jingshah rem kaba ar ha ka Super 8 da 61 run ha ka New Zealand ha ka sngi Balang ha R. Premadasa International Cricket Stadium kaba ha Colombo.
Kane la wan lyngba ka jingïalehkai bha u Rashim Ravindra uba la khur 4 wiket ryngkat u Matt Henry uba la khur 2 wiket na ka bynta ban khanglad ïa ka Sri Lanka ban kynjoh sha ka thong.
Ha kane ka jingïakhun jong ka Group-2, ka New Zealand kaba la kam trai ban tied nyngkong, ka la kamai 168 run bad shah pynhap 7 wiket ha ki 20 over. Kane ka la wan lyngba ka jingïalehkai bha u kapten ka kynhun u Mitchell Santner u ba la tied 47 run na ki 26 bol kynthup ïa 2 tylli ki ‘four’ bad 4 tylli ki ‘six’ ryngkat bad u Cole McConchie uba la ïoh 31 run na ki 23 bol (3x4s & 2x6s). Haba wan shimti ïa ka pali tied kaba ar, ka Sri Lanka ka la kamai tang 107 run bad shah pynhap 8 wiket. U Kamindu Mendis u la long u nongtied uba la ïoh bun da kaba u la tied 31 run na ki 23 bol.
Lyngba kane ka jingjop ka New Zealand ka la nang jan ban jam sha ka semi final na kane ka group.
