Imphal, Rymphang:
Ka sorkar pdeng ka la mynjur ban tei ïa ki 5,000 tylli ki ïing hapoh ka jingtreikam jong ka Pradhan Mantri Awaas Yojana – Gramin (PMAY-G) na ka bynta ban ai jaka sah ïa ki briew kiba la shah pynkynriah jaka na ka jingïakajia bad ki jingthombor jaitbynriew ha Manipur.
Kane ka jingmynjur ka long hadien ka jingïakynduh jong u Myntri Rangbah ka Jylla u Yumnam Khemchand Singh bad u Shivraj Singh Chouhan, uba long u Myntri ka sorkar pdeng uba dei khmih ïa ka tnad ka rep ka riang bad ka tnat pynroi ïa ki thaiñ nongkyndong ha New Delhi.
Ki arngut ki Symbud Myntri Rangbah jong ka jylla, ka Nemcha Kipgen bad u Losii Dikho ki la ïadon lang ha katei ka sngi.
Ka ophis jong u Myntri Rangbah ka Jylla ka la ong ba u Chouhan u la pynthikna ïa ki nongïalam ban ïarap ban pynphai biang ïa ka jingsuk bad ka jinglong jingman ha ka jylla.
Ha kaba sdang jong une u bnai, ka sorkar jylla ka la ai ïa ka jingtyrwa na ka bynta ka projek ba kyrpang hapoh ka PMAY-G ban shna 5 hajar tylli ki ïing na ka bynta ki briew kiba la shah pynkynriah jaka bad kylla nong phetwir hapoh ka ri.
Ka tnad pynroi nongkyndong ka la mynjur ïa ka jingplie lad kaba kyrpang na ka bynta ka jingwad bniah ïa ki longïing Awaas+ 2024 ban lum ïa ki jingtip ba bniah jong ki longïing kiba shah ktah kiba dei hok.
La shah ruh ïa ka sorkar jylla ban bteng ïa ka jingpynrung kyrteng ïa ki nongïoh myntoi kiba dei hok kiba dei shah kynthup hapoh ka projek ba kyrpang jong ka PMAY-G.
Ka tnad pynroi nongkyndong ka la bthah ïa ka sorkar Manipur ban ithuh ïa ki nongïoh myntoi na ka bynta katei ka projek ba kyrpang katkum ki kyndon jong ka PMAY-G. Ïa kine ki ïing yn shna katkum ki kyndon jong ka Framework ban pyntreikam ïa ka PMAY-G.
La shah ruh ïa ka sorkar jylla ban mang ïa ki ïing na ka bynta ki nongïoh myntoi kiba dei hok hapoh ka projek ba kyrpang sha kiba la pyllait jingïarap kham mynshwa hapoh ka PMAY-G, hynrei ki ïing jong ki ki la shah pynpra ha ka por ba don ka jingïakynad hapdeng ki jaitbynriew.
U Myntri Rangbah ka Manipur u la ïakynduh ïa u Myntri Rangbahduh ka ri u Narendra Modi ha ka sngi Ba-ar bad u la pynshai ïa u halor ki sienjam ba la shim da ka sorkar jylla ban wanrah biang ïa ka shongsuk shongsaiñ.
U Khemchand u la kyntu ïa u Myntri Rangbahduh ban shimkhia kyrpang ïa ka jingpynkupbor ïa ki kynthei ha ki jaka lum bad ki jaka them jong ka Manipur, bad khot sngewbha ïa u ban leit jngoh ïa kane ka jylla.
Ka jingïakynad jaitbynriew, kaba la mih hapdeng ki riewlum Meiteis bad Kuki-Zo ha u bnai Jymmang jong u snem 2023, ka la pynlong ïa 260 ngut ki briew ban ïap bad 60,000 ngut kiwei pat ki la phetwir.
Ka jingbun paid jong ki briew kiba la shah pynkynriah jaka ki dang don haduh mynta sha ki jaka sah ba shipor ba la buh kyrpang na ka bynta jong ki.
