Shillong, Rymphang 25
U Bah Ardent Miller Basaiawmoit, MLA ka Nongkrem bad President ka Voice of the People Party (VPP) u la khmih lynti ba ka Expert Com-mittee ka la dei ban ai jingmynjur haduh 47 percent ha ka bhah thungkam thungjam hynrei ka pynneh biang kumjuh.
U Bah Ardent u la pynpaw ba ka seng jong u kam hun bad sngewtynnad satia ïa ka jingai jingmut jong ka Expert Committee ban pynneh kumba ka long ïa ka Meghalaya State Reserva-tion Policy. U la ong ba ki paidbah bad ka VPP kim pdiang ïa ka kaiphod ka Expert Committee halor ka bhah thungkam thungjam.
Kane ka jingbym pdiang ïa ka kaiphod ka Expert Committee halor ka bhah thungkam thungjam ka dei haba u wanrah da ka Short Duration Discussion ne ka jingïatai kaba lyngkot ha ïingdorbar thawaiñ ha ka sngi Balang.
U Bah Ardent u la pynpaw ba u khmih lynti ba ka Expert Committee kan ai jingmut ban pynkiew haduh 47 percent ïa ka bhah thungkam ïa ki Khasi bad Jaiñtia na ka 40 percent kaba la don lypa, namar ki la bun kiba la nang la stad bad la bun briew bad ki Garo kin sah beit 40 percent hynrei ka committee ka la kdew ban pynneh biang ïa kajuh.
U Bah Ardent u la ong ruh ba ka jingbun briew ka la tam ki Khasi arshah ban ïa ki Garo.
U la ong ka jingbun ki samla pule kiba la pyndep jingpule ki la bun bha hynrei lada la lah ban pynkiew sa 7 percent yn lah ban pynduna ka jingkyrduhkam.
U kyrmen ba ha ka jingïalam u Conrad K Sangma kum u Myntri Rangbah ka Jylla ba um dei ban pynkut ïa kane ka jingdawa ban pynkylla ïa ka bhah thungkam hynrei dei ban peit bniah biang.
La shimbynta ruh da u Bah Adelbert Nongrum uba la wanrah hashwa da ka Zero Hour Notice ïa kane kajuh ka mat.
