Chennai, Rymphang:
Ka nongïalam ba la shahbeh jong ka seng AIADMK, ka VK Sasikala, kaba dei ka paralok bajan eh jong ka Myntri Rangbah barim jong ka jylla Tamil Nadu ka J Jayalalithaa, ha ka sngi Ba-ar, ka la sei madan ïa ka seng saiñ pyrthei kaba thymmai, khlem da pynpaw ïa ka kyrteng jong ka, bad ka la plie ïa ka lama jong ka, kaba long ka dak jong ka jingrung biang jong ka sha ka kam saiñ pyrthei kaba treikam, hadien khyndai snem jong ka jingbym don bynta ha ka kam saiñ pyrthei.
Ïa ka kyrteng jong ka seng kaba ka la seng thymmai yn sa pynbna kham hadien. Ha katei ka lama la pyni ïa ki rong ïong, ka rong lieh bad ka rong saw, ha ryngkat ki dur jong ki riew pawkhmat bad ki rishot jong ka Dravidian u C.N.Annadurai, u M.G.Ramachandran bad ka J Jayalalithaa.
Haba kren ha ka jingïalang paidbah ha Kottaimedu hajan Pasumpon ha Ramanathapuram distrik, ka Sasikala ka la ong, “Nga la shu sngap jar baroh kine ki snem da kaba kyrmen ïa ka jingïatylli, hynrei ka jinglong jingman kaba mynta ka la pynbor ïa nga ban shim ïa kane ka rai.”
