Khliehriat, Rymphang 25
Ka Khasi Students’ Union (KSU) Narpuh Circle hadien ba ka la ïoh jingtip ba ka don ka jingkhlong maw beaiñ da ki nong Assam ha ka Wah Malidor kaba dei hapoh u pud u sam ka Meghalaya, kumta ha ka jingïalam u President, Phanuel Tongper bad General Secretary, Yooni Muksor ryngkat bad ki dkhot ha ka 24 tarik Rymphang mar mar kila hiar leit jurip bad lap da lade ïa kane ka jingkhlong maw beaiñ.
Ka Seng ka la ong ba ka la lap markhmat ïa ki nong Assam kiba don da ki spah ngut kiba la pyndonkam ruh da ki puh shilum (JCB) bad pynkit da ki phew trok ki maw shapoh Assam kaba pynjulor ïa ka mariang bad ïa ka Wah Malidor, kata hadien ba ka seng ka la pynsangeh noh mardor bad pynher krad syndon ïa ki phew tylli ki trok bad ki nongtrei kiba dei na Assam.
Haba tohkit bniah na kine ki nongtrei kiba don ha kane ka jaka mano ba pynïaid bad ai bor ïa ki ban khlong ne tih maw ha wah Malidor, kila ïathuh ïa ka kyrteng kum u Lisu Terang uba dei u Karbi uba shong ba sah ha ka shnong Malidor Meghalaya.
Haba ka seng kala ïakren bad u Lisu lyngba ka phone, u ong ba um don ha shnong bad haba la tohkit ïa u nangno u la ïoh jingbit bad hato u la ïoh ïa ka ‘environment clearance’ ban khlong maw beaiñ na kane ka wah, u Lisu u la ong ba um don satia kino kino ki kot ki sla kum ka jingïoh jingbit ne ‘clearance’ na kano kano ka tnad Sorkar.
Kumta ka seng kala phah ïa u ban sangeh noh mardor ïa kane ka kam bad maham ruh lada kane ka jingkhlong maw ka dang bteng ka seng kam banse ban leh da kaba tyngeh. Ha ka jingïakren la sngewthuh ba une u briew u don ka jingïadei bad ki briew jong ka tnad Forest kiba dei khmih ïa katei ka jaka.
Ka Seng ka pynpaw ka jinglyngngoh ba mynta la lai bnai kynthih kane ka kam beaiñ ka la ïaid katkum ka jingtip na ka jingtohkit bniah, hynrei ki briew jong ka tnad Forest kaba don ka Beat Office ha shnong Ratachera, bad Ranger Office ha Umkiang kim ïohi satia ïa kane kam beaiñ kaba hap hapoh ka jingkhmih jong ki.
Halor kane, ka seng ka suba jur ba ka lah ban dei ka jingïadonkti lang jong ki briew jong ka tnad Forest bad une u briew uba pynïaid ïa kane ka kam khlong maw beaiñ.
Ha kawei ka liang, ka seng ka pynpaw ka jingbynñiaw ïa kane ka jingkhlong maw beaiñ, kaba la ktah shikatdei ïa ka mariang kumjuh ïa ka Wah Malidor kiba don ki dohum dohwah khamtam kan ktah ïa u pud u sam jong ka jylla namar ka Wah Malidor kala long kum ka ‘Natural Boundary’ hapdeng ka Jylla Assam bad Jylla Meghalaya namar lyngba kane ka jingkhlong maw beaiñ ka wah Malidor kaba heh ha ki por lyiur kan sa kyntur pud shuh shuh sha ka phang jong ka Jylla.
Haba pynkut ka seng, kala dawa ïa ki bor ba dei khmih na ka JHADC, na ka State Forest & Environment Department bad kumjuh na ki bor District ba ki dei ban tuklar mardor katkum ka aiñ bad ban leh da kaba tyngeh ïa kiba donkti ha kane ka kam beaiñ.
