Shillong, Rymphang 25
U Myntri Rangbah ka Jylla Conrad K Sangma ha ka sngi Balang u la pyntip ba ka jaka ba heh 7.28 hectare ha Riat Khwan Reserve Forest-kaba aiwai mynshuwa- la pynskhem mynta ban pyndonkam kum ka jaka theh ñiut ka Marten hadien ka jingïoh jingbit na ka Sorkar Pdeng katkum ka Forest (Conservation) Act, 1980.
“Ïa ka jingpynskhem la leh hadien ba ïoh ïa ka jingbit ban pynkylla ïa ka jaka khlaw sha ka jaka ban pyndonkam sha kiwei pat ki kam,” ong u Conrad haba jubab ha ïingdorbar, haba pyntip ïa ka jingai jingbit ba khatduh jong ka Ministry of Environment and Forest ba 21 tarik Naiwieng 2011.
U la pynthikna ba ïa ka jingaiwai la nang pynjlan haduh u snem 2026, halor ki kyndon kiba pyrkhing bha.
“Ka jaka kan ïai bteng ban long ka jaka Reserve Forest,” u la ong haba bynrap ba ka jingpyndonkam kan long beit thik tang ïa ka jingbret ñiut bad kam dei ban don ka jingdie, jingaiwai, ne buh bynda lane pyndonkam ha kiwei pat ki kam khlem da ïoh jingbit shuwa na ki bor ba dei khmih”.
